पड़ोसी राष्ट्र नेपाल में अतवार के भइल प्रतिनिधि सभा अउर प्रांतीय विधानसभा के सदस्यन खातिर मतदान छिटपुट घटना के छोड़ के शांतिपूर्ण ढंग से संपन्न हो गइल। रूपनदेही में जहां 66 फीसदी मतदान भइल, उहवें नवलपरासी में 46 प्रतिशत मतदान रिकार्ड कइल गइल। मिलल जानकारी के मुताबिक कहीं मतपेटी तुड़ले के घटना भइल त कहीं उपद्रवी कुल माहौल के अशांत करे के कोशिश कइलें सब। मतदान के दौरान देश भर के कुछ मतदान केंद्रन पर झड़प भी भइल। मतदान के दौरान 25 जगह पर फायरिंग भइल जेसे 42 लोग घाही हो गइल।
59 कैदी सब कइलें मतदान
नेपाल रूपनदेही भैरहवा जिला कारागार के 59 बंदी सब मतदान कइलें। अतवार के 455 बंदियन में से 59 बंदी लोग वोट देहल। मतदान अधिकारी गंगा प्रसाद बतवलें कि जेल में वोट खातिर व्यवस्था कइल गइल। ऊ कहनें कि मतदाता सूची में शामिल बंदियन के वोट डरले के मौका दिहल गइल।
बैलेट बॉक्स जरवले के बाद चितवन में हवाई फायरिंग
नेत्र विक्रम चंद बिप्लव के नेतृत्व में नेपाल कम्युनिस्ट पार्टी के कार्यकता सब चितवन में मतपेटियन के जरा दिहलें। उपद्रवियन के हटावे खातिर पुलिस गोली चलवलस। अतवार बिहाने करीब दस बजे राप्ती नगर पालिका-8 स्थित ब्रह्मस्थान नेशनल बेसिक स्कूल के बी मतदान केंद्र पर बिप्लवा के नेतृत्व वाले सीपीएन कार्यकर्ता लोग मतपेटियों में आग लगा दिहलस। चितवन के डीएसपी सूदन आचार्य बतवलें कि ‘बी’ मतदान केंद्र के चार मतपेटियों में से एगो के जरा दिहल गइल बा। मतपत्र नाइ जsरल।
Comments are closed.