स्पोर्ट्स डेस्क। भारत आ श्रीलंका के बीच टेस्ट सीरीज में श्रीलंका के जुवा बल्लेबाज सोनल दिनुशा अपना सानदार प्रदर्शन से इतिहास रच देले बाड़ें। सोनल भारत के खिलाफ ऊ कारनामा कइले बाड़ें, जवन पिछिला 26 साल से कवनो बल्लेबाज ना कs पवले रहे। एह प्रदर्शन से श्रीलंका के भविष्य के एगो सानदार खिलाड़ी मिलला के उम्मीद बढ़ गइल बा।
बांग्लादेश के खिलाफ कइले रहलें टेस्ट डेब्यू
सोनल दिनुशा पिछिला साल बांग्लादेश के खिलाफ आपन टेस्ट डेब्यू कइले रहलें। अब ले ऊ चार टेस्ट मैच खेल चुकल बाड़ें आ 600 से जादे रन बना चुकल बाड़ें। उनका टेस्ट करिअर के बल्लेबाजी औसत 61.66 के आसपास बा। सोनल अब ले चार गाे शतक आ दुगो अर्धशतक लगा चुकल बाड़ें।
चार लगातार पारी में तीन गो शतक आ अर्धशतक
भारत के खिलाफ चल रहल सीरीज में सोनल के बल्ला जमके बोलल बा। सीरीज के पहिला टेस्ट के पहिला पारी में ऊ सानदार शतक लगवले। एकरा बाद दूसरका पारी में 84 रन के पारी खेललें। दूसरा टेस्ट के पहिला पारी में सोनल आपन सानदार फॉर्म जारी रखलें आ 162 गेना पs 103 रन बनवलें। एह पारी में आठ चौका आ तीन गो छक्का सामिल रहे। दूसरको पारी में ऊ शतक लगावे में सफल रहलें।
एह तरे से सोनल भारत के खिलाफ लगातार चार पारी में तीन गो शतक आ अर्धशतक लगावे वाला बल्लेबाज बन गइल बाड़ें। एकरा से पहिले साल 2000 में जिम्बाब्वे के दिग्गज बल्लेबाज एंडी फ्लावर भारत के खिलाफ ई कारनामा कइले रहलें। फ्लावर चार लगातार पारी में दुगाे शतक आ दुगो अर्धशतक लगवले रहलें, जवना में एगो पारी में नाबाद 232 रन सामिल रहे।
प्रथम श्रेणी क्रिकेट में बा सानदार रिकॉर्ड
खाली 25 साल के सोनल दिनुशा प्रथम श्रेणी क्रिकेट में सानदार प्रदर्शन कइले बाड़ें। ऊ 69 मैच में 3882 रन बना चुकल बाड़ें। एह दौरान उनका बल्ला से 12 शतक आ 20 अर्धशतक निकल चुकल बा।
अब देखे वाला बात ई बा कि सोनल दिनुशा अपना इंटरनेशनल करिअर में आगे कइसन प्रदर्शन करेलें। अभी उनका वनडे आ टी20 इंटरनेशनल में आपन प्रतिभा देखावे के मवका मिलल बाकी बा।
Read Also: Realme C100i : 6500mAh बैटरी आ 120Hz डिस्प्ले वाला सस्ता फोन भारत में लॉन्च
