IND vs BAN वनडे: ईशान किशन लगवलें वनडे में सबसे तेज दोहरा शतक, क्रिस गेल-सहवाग सहित कई दिग्गज लोग के छोड़लें पीछे

ईशान किशन वनडे करियर में आपन पहिला दोहरा शतक बांग्लादेश के खिलाफ शनिचर के (10 दिसंबर) के लगवलें। ई उनके करियर के पहिला शतक भी ह। किशन चटगांव में अपने पारी के दौरान कई रिकॉर्ड तोड़ दिहले। ई वनडे में सबसे तेज दोहरा शतक लगावे वाला खिलाड़ी बन गइलें। एह मामला में ऊ वेस्टइंडीज के पूर्व विस्फोटक बल्लेबाज क्रिस गेल के रिकॉर्ड तोड़ दिहलें। किशन 131 गेंद पर 210 रन बना के आउट भइलें। ऊ अपनी पारी में 24 चौक अउर 10 छक्का लगवलें।

किशन 126 गेंद पर आपन दोहरा शतक लगवलें। क्रिस गेल के बात कइल जाव त ऊ 2015 विश्व कप में जिम्बाब्वे के खिलाफ 215 रन के पारी खेलले रहनें। गेल ऑस्ट्रेलिया के कैनबरा में 138 गेंद पर दोहरा शतक लगवले रहनें। किशन भारत खातिर वनडे में दोहरा शतक लगावे वाले चउथा बल्लेबाज बन गइल बानें। उनसे पहिले सचिन तेंदुलकर, वीरेंद्र सहवाग अउर रोहित शर्मा दोहरा शतक लगवले रहनें। ओवरऑल रिकॉर्ड के बात कइल जाव त उ दोहरा शतक लगावे वाले दुनिया के सातवां बल्लेबाज हवें। ई वनडे के नौवां दोहरा शतक ह। रोहित शर्मा एक से ज्यादा दोहरा शतक लगावे वाले इकलौता बल्लेबाज बानें। ऊ तीन बेर अइसन कइले बानें।