स्पोर्ट्स डेस्क। भारत आ इंग्लैंड के बीच खेलल जा रहल तीन मैच के वनडे सीरीज अब अपना सबसे रोमांचक मोड़ पs पहुंच गइल बा। सीरीज के तीसरका आ आखिरी मुकाबला अतवार के ऐतिहासिक लॉर्ड्स क्रिकेट ग्राउंड पs खेलल जाई। दुनु टीम अभी एक-एक मैच जीत चुकल बाड़ी सs, एकरा से ई मुकाबला तय करी कि सीरीज के ट्रॉफी केकरा हिस्सा में जाई।
रोहित शर्मा पs टिकल बा सब केहू के नजर
तीसरका वनडे से पहिले भारतीय कप्तान रोहित शर्मा चरचा के केंद्र में बाड़ें। दूसरका वनडे में धीमा पारी खेलला के बाद उनका भविष्य के लेके तरे-तरे के चरचा सुरू हो गइल रहे। हालांकि, बीसीसीआई सचिव देवजीत सैकिया साफ कs देलें कि लॉर्ड्स वनडे रोहित के आखिरी मुकाबला नइखे।
एह निर्णायक मैच में रोहित से टीम के मजबूत सुरुआत के उम्मेद बा। जदि ऊ बड़ स्कोर बनावे में सफल रहिहें तs भारत के सीरीज जीते के संभावना बहुते बढ़ जाई।
सानदार फॉर्म में जो रूट
इंग्लैंड खातिर सबसे बड़ हथियार जो रूट बाड़ें। ऊ लगातार दू मैच में सानदार बल्लेबाजी कइले बाड़ें आ अभी सीरीज में 175 रन बिना आउट भइले बनवले बाड़ें। ओने, कप्तान हैरी ब्रूक, बेन डकेट आ जोस बटलर से टीम के बड़ पारी के उम्मेद बा।
भारत में हो सकेला बदलाव
भारतीय टीम के प्लेइंग इलेवन में बदलाव लगभग तय मानल जा रहल बा। ऑलराउंडर वॉशिंगटन सुंदर हैमस्ट्रिंग चोट के चलते बाहर हो गइल बाड़ें। उनका जगह हर्ष दुबे के मवका मिल सकेला, जबकि कुलदीप यादव अंतिम एकादश में सामिल हो सकेलें। बेमारी से उबर चुकल केएल राहुल के वापसी लगभग तय मानल जा रहल बा।
लॉर्ड्स पिच रिपोर्ट
लॉर्ड्स के पिच पs सुरुआत में तेज गेंदबाजन के मदद मिलेला। नया गेना से बल्लेबाजी आसान नइखे रहेला। बाद में रन बनावे खातिर धैर्य जरूरी होला। एह मैदान पs 2017 के बाद से कवनो टीम सफलतापूर्वक लक्ष्य के पीछा करत वनडे मुकाबला नइखे जीत पवले। एहसे टॉस जीते वाला टीम पहिले बल्लेबाजी करे के फैसला ले सकेले।
संभावित प्लेइंग-11
भारत (संभावित XI):
रोहित शर्मा, शुभमन गिल, विराट कोहली, श्रेयस अय्यर, केएल राहुल (विकेटकीपर), अक्षर पटेल, शिवम दुबे, हर्ष दुबे/कुलदीप यादव, जसप्रीत बुमराह, गुरनूर बरार, प्रसिद्ध कृष्णा।
इंग्लैंड (संभावित XI):
बेन डकेट, जैकब बेथेल, जो रूट, हैरी ब्रूक (कप्तान), जोस बटलर (विकेटकीपर), सैम करन, विल जैक्स, गस एटकिंसन, जोफ्रा आर्चर/जोश टंग, साकिब महमूद/जोश टंग, आदिल रशीद।
Read Also: Sindhu Wins Japan Open : सात साल बाद पीवी सिंधू के सानदार वापसी, जापान ओपन जीते वाला बनली पहिला
