नई दिल्ली/रामपुर। समाजवादी पार्टी के वरिष्ठ नेता आजम खान के खिलाफ प्रवर्तन निदेशालय (ED) के कार्रवाई जारी बा। बुध के सबेरे ईडी के टीम रामपुर, सहारनपुर, दिल्ली आ गाजियाबाद सहित 10 ठिकानन पs छापेमारी कइलस। एह कार्रवाई में रामपुर इस्थित मौलाना मोहम्मद अली जौहर यूनिवर्सिटी आ ट्रस्ट से जुड़ल ठिकाना सामिल बा।
जौहर यूनिवर्सिटी में ईडी के टीम सबेरे 7 बजे के करीब पहुंचल। टीम विश्वविद्यालय से जुड़ल दस्तावेज आ वित्तीय रिकॉर्ड के जांच कs रहल बिया। जानकारी के मोताबिक, आजम खान के आवास पs ईडी के टीम पहुंचल बिया।
जौहर यूनिवर्सिटी में ईडी के टीम पहुंचल
रामपुर इस्थित जौहर यूनिवर्सिटी में बुध के सबेरे ईडी के कार्रवाई सुरू भइल। तलाशी के दौरान केंद्रीय रिजर्व पुलिस बल (CRPF) के जवान तैनात रहे लो। अधिकारी विश्वविद्यालय आ ट्रस्ट से जुड़ल कागजात, वित्तीय रिकॉर्ड आ आउर दस्तावेजन के जांच कs रहल बा लो। डिजिटल सबूत के जांच के हिस्सा बनावल जा सकेला।
10 ठिकानन पs एक संगे छापेमारी
ईडी के ओर से जारी जानकारी के माेताबिक, लखनऊ जोनल ऑफिस के टीम PMLA, 2002 के धारा 17 के तहत रामपुर, सहारनपुर आ दिल्ली में 10 ठिकानन पs तलाशी अभियान चलवले बिया। ई कार्रवाई मौलाना मोहम्मद अली जौहर ट्रस्ट आ मोहम्मद अली जौहर यूनिवर्सिटी, रामपुर से जुड़ल मनी लॉन्ड्रिंग जांच के सिलसिला में कइल गइल बा।
मनी लॉन्ड्रिंग जांच से जुड़ल बा कार्रवाई
ईडी के मोताबिक, जांच सरकारी कॉन्ट्रैक्ट से जुड़ल फंड के कथित तौर पs प्राइवेट कॉन्ट्रैक्टर के माध्यम से दूसरका जगह इस्तेमाल कइला से जुड़ल बा। जांच में इहो देखल जा रहल बा कि सरकारी कॉन्ट्रैक्ट से जुड़ल रकम के कथित तौर पs ट्रस्ट आ यूनिवर्सिटी से संबंधित काम में कइसे इस्तेमाल कइल गइल।
जांच एजेंसी के मोताबिक, कुछ कॉन्ट्रैक्टर आ ट्रस्ट के बीच पईसन के लेन-देन के जानकारियो सामने आइल बा। एमे डोनेशन आ निर्माण कार्य से जुड़ल वित्तीय लेन-देन के जांच सामिल बा।
अपराध से जुड़ल कमाई आ वित्तीय रिकॉर्ड के तलाश
ईडी के तलाशी अभियान के मुख्य उद्देश्य कथित अपराध से भइल कमाई से जुड़ल सबूत, वित्तीय रिकॉर्ड, दस्तावेज आ डिजिटल साक्ष्य जुटावल बतावल गइल बा। जांच टीम सरकारी फंड के कथित तौर पs दोसरा जगह लगावे आ ओकर इस्तेमाल से जुड़ल दस्तावेज के खंगाल रहल बिया। तलाशी पूरा भइला के बाद जांच के आधार पs आगे के कार्रवाई तय हो सकेला।
आजम खान के बढ़ सकत बा मुश्किल
ई कार्रवाई आजम खान आ जौहर यूनिवर्सिटी से जुड़ल मामिला में ईडी के जांच के आगे बढ़े के संकेत दे रहल बा। फिलहाल तलाशी अभियान जारी बा आ जांच एजेंसी के ओर से बरामदगी भा आगे के कार्रवाई के विस्तृत जानकारी सामने अइला के इंतजार बा।
Read Also: Kolkata Hotel Fire : कोलकाता के होटल में आधा रात के भीषण आग से 9 लोगन के मौत
