T20 विश्वकप 2024: नयका फॉर्मेट में होई अगिला टी20 विश्व कप, कुल 20 टीम, पहिला बेर अमेरिका में होई आईसीसी टूर्नामेंट

टी20 विश्व कप 2022 के खतम भइले एक्को हप्ता नइखे भइल, लेकिन आईसीसी 2024 टी20 विश्व कप के तैयारी शुरू कs देहल गइल बा। एह टूर्नामेंट के मेजबान देश से ले के फॉर्मेट अउर टीम संख्या तक सब कुछ तय हो चुकल बा। 2024 में होखे वाला टी20 विश्व कप 2022 से काफी अलग होई। आईसीसी बतवलस कि टी20 विश्व कप 2024 में कुल 20 टीम शामिल होई अउर टूर्नामेंट के फॉर्मेट भी पहिले से अलग होई। अमेरिका के पहिला बेर कौनो आईसीसी टूर्नामेंट के मेजबानी मिलल बा।

टी20 विश्व कप 2024 में नॉकआउट मैच शुरू होखले से पहिले दू चरण होई। 2021 अउर 2022 टी20 विश्व कप में भी सेमीफाइनल से पहिले दू चरण होत रहे, जेमें क्वालिफाइंग राउंड अउर सुपर-12 के चरण शामिल रहल, लेकिन अब अइसन नाइ होई।

एह बेर टूर्नामेंट में कुल 20 टीम होइहें जिनके चार ग्रुप में बांटल जाई। हर ग्रुप में पांच टीमें होई, जौन आपस में खेली। हर ग्रुप के शीर्ष दू टीम सुपर आठ राउंड में जाई। इहाँ आठ टीमन के दू ग्रुप में बांटल जाई। हर ग्रुप में चार टीम होई। इहां दूनो ग्रुप के शीर्ष दू टीम सेमीफाइनल में पहुंची। हालांकि, अभिन एह टूर्नामेंट खातिर सब 20 टीम तय नइखे कइल गइल। फिलहाल मेजबान के रूप में, वेस्ट इंडीज अउर अमेरिका के टीम एह विश्व कप खातिर क्वालिफाई कs चुकल बानें एकरे बाद 2022 विश्व कप में निम्मन प्रदर्शन अउर 14 नवंबर के आईसीसी रैंकिंग के आधार पर 10 अन्य टीम एह टूर्नामेंट में जगह बना चुकल बा।