Sidharth-Kiara: ओटीटी पs स्ट्रीम होई सिद्धार्थ-कियारा के शादी? इ प्लेटफॉर्म पोस्ट साझा कइके दिहलस हिंट

By Sudhir Kumar Mishra On Feb 3, 2023

सिद्धार्थ मल्होत्रा आ कियारा आडवाणी बी टाउन के फेवरेट कपल्स में शुमार बा लो । आज काल्ह इ दुनो लोग अपना शादी के लेके सुर्खियन में चारो तरफ छ्वले बा लो । खबर अइसन आवत बा कि इ जोड़ा अगिला हफ्ता जैसलमेर के सूर्यगढ़ पैलेस में शादी के बंधन में बन्हाये जा रहल बा । कपल के शादी में परिवार आ करीबी दोस्त लोग शामिल होंइहें। 6 तारीख के कपल सात फेरा लिही आ 4-5 फरवरी के ओह लोग के प्री वेडिंग फंक्शन होई। ओहिजे, एह सब के बीचे इहो चर्चा बा कि सिद्धार्थ आ कियारा के शादी ओटीटी पs स्ट्रीम हो सकेला ।

अमेजन प्राइम वीडियो के एगो पोस्ट के बादे से सिद्धार्थ मल्होत्रा आ कियारा आडवाणी के शादी के ओटीटी पs स्ट्रीम होखे के कयास लगावल जा रहल बा । दरअसल, अमेजन प्राइम अपना इंस्टाग्राम अकाउंट पs सिद्धार्थ आ कियारा के ‘शेरशाह’ फिल्म के दौरान के एगो तस्वीर शेयर कइले बा , जेकरा नीचे फोर्ट के तस्वीरो लागल बा । एकरा बादे से एह जोड़ा के शादी के ओटीटी पs स्ट्रीमिंग के कयास बड़ा तेजी से लागे लागल रहे । हालांकि खबरन के अनुसार ओटीटी प्लेटफॉर्म के ओर से ई खाली एगो अप्रीशीएशन पोस्ट बा आ एकरा से बेसी कुछो ना ।

**किआरा आडवाणी ,सिद्दार्थ मल्होत्रा ,फोटो: सोशल मीडिया**

ओहिजे ,सिद्धार्थ आ कियारा के शादी के विरल भयानी कवर करिहें । उ अपना पैपराजी हैंडल पर पोस्ट साझा कइके लिखले , ‘हम कियारा आ सिद्धार्थ के शादी के कवर करे खातिर जैसलमेर जा रहल बानी जा ।’ ओहिजे , शादी में सिक्योरिटी अरेंजमेंट्स के जिम्मेदारी शाहरुख खान के एक्स बॉडीगार्ड यासीन युगल के दिहल गईल बा। बता दिहीं कि कपल के शादी के फंक्शन 4 तारीख से शुरू हो जाई।