पटना। बिहार के भोजपुर जिला में अतवार के भोर में एगो बड़ रेल हादसा होत-होत बच गइल। आरा रेलवे स्टेशन से कुछ दूरी पs अलीपुरद्वार से दिल्ली जाये वाली महानंदा एक्सप्रेस (ट्रेन नंबर 15484) अचानक डिरेल हो गइल। ट्रेन के पटरी से उतरतही यात्रियन में अफरा-तफरी मच गइल। हादसा के समय ट्रेन में सवार बहुत लोग नींद में रहे। तेज आवाज सुनतही यात्री लोग घबरा के उठ गइल। हालांकि राहत के बात ई रहल कि हादसा में कवनो यात्री के हताहत होखे के खबर नइखे।
आरा स्टेशन से निकलला के कुछ देर बाद डिरेल भइल ट्रेन
मिलल जानकारी के मोताबिक, महानंदा एक्सप्रेस आरा रेलवे स्टेशन के प्लेटफॉर्म नंबर-2 से रवाना भइल रहे। स्टेशन से कुछ दूर आगे पश्चिमी ओवरब्रिज के लगे पहुंचतही ट्रेन के इंजन, SLR बोगी आ एगो AC कोच के पहिया पटरी से उतर गइल।
तेज आवाज से यात्रियन में मचल हड़कंप
हादसा अतवार के भोर के समय भइल। ओह समय लोग घबरा के अपना सीट से उठ गइल आ का भइल, ई समझे के कोसिस करे लागल।
कवनो यात्री के हताहत होखे के खबर नइखे
हादसा के बाद घटनास्थल पs मवजूद लोग आ ट्रेन में सवार यात्रियन के बीच चिंता के माहौल बन गइल। हालांकि राहत के बात ई रहल कि दुर्घटना में कवनो यात्री के हताहत होखे के सूचना नइखे। हादसा के गंभीरता के देखत रेलवे के ओर से तुरंत इस्थिति के जायजा लिहल गइल।
रेलवे अधिकारी आ कर्मचारी घटनास्थल पs पहुंचलें
घटना के जानकारी मिलतही रेलवे के अधिकारी आ कर्मचारी घटनास्थल पs पहुंच गइल लो। अधिकारी लोग मवका के निरीक्षण कs के इस्थिति के जायजा लेलें। एकरा बाद रेलवे के टीम डिरेल भइल ट्रेन के हिस्सा के अलग करे के काम सुरू कs देलस।
बोगियन के अलग कs के दोसरा इंजन से रवाना भइल ट्रेन
रेलवे के टीम डिरेल भइल हिस्सा आ बोगियन के अलग-अलग कइलस। एकरा बाद दोसरा इंजन के मदद से ट्रेन के आगे खातिर रवाना कइल गइल। एह पूरा प्रक्रिया के दौरान कुछ समय खातिर रेल परिचालन प्रभावित रहल।
डिरेलमेंट के कारण के जांच में जुटल रेलवे
महानंदा एक्सप्रेस के डिरेल होखे के असली वजह अभी साफ नइखे भइल। रेलवे के ओर से हादसा के कारणन के जांच कइल जा रहल बा। जांच पूरा भइला के बादे पता चल पाई कि ट्रेन के इंजन, SLR बोगी आ AC कोच के पहिया काहे पटरी से उतरल।
Read Also: Bhagalpur News : भागलपुर में सड़क पs चढ़ल गंगा के पानी, कइयन गो गांवन के संपर्क टूटे के खतरा
