छपरा के हरिहर क्षेत्र में आयोजित प्रसिद्ध सोनपुर मेला में आज सांझ भोजपुरी आ मैथिली के लोकप्रिय गायिका मैथिली ठाकुर अपना प्रस्तुतियन से श्रोता लोगन के मंत्रमुग्ध करिहें। पर्यटन विभाग के ओर से तइयार मुख्य पंडाल में उनका भजनन आ गीतन के सुने खातिर बड़ भीड़ उमड़े के उम्मेद बा।
पिछलका बरिस में मैथिली ठाकुर अपना बेहतरीन प्रस्तुति से श्रोता लोगन के दिल जीतले रहली। ऊ देवी भगवती के स्तुति से सुरुआत कइले रहली आ महिषासुर मर्दिनी स्त्रोत, शिव तांडव आ रामायण के भजन प्रस्तुत कइले रहली। एकरा अलावे “दमादम मस्त कलंदर,” “छाप तिलक स छीनी रे,” आ “मेरे रस्मे कमर” जइसन लोकप्रिय गीतन से माहौल के संगीतमय बना देले रहली। लाखन लोगन के भीड़ उनका प्रस्तुति के आनंद लेले रहे।
सोनपुर मेला, जे धार्मिक आ सांस्कृतिक आयोजन खातिर प्रसिद्ध बा, में पर्यटन विभाग रोज अलग-अलग कलाकारन के ओर से रंगारंग कार्यक्रम आयोजित कs रहल बा। मेला उद्घाटन के बाद से इहां के रौनक लगातार बढ़ रहल बा। देस-बिदेस से आइल पर्यटक मेला के आनंद ले रहल बा लो। आज मैथिली ठाकुर के प्रस्तुति के लेके श्रोता लोगन में जबरदस्त उत्साह बा, आ बड़ संख्या में लोग उनकर सुरीली आवाज के आनंद लेवे खातिर पहुंची लो।
Comments are closed.