सेंट्रल डेस्क : फिनलैंड लगातार आठवां बेर दुनिया के सबसे खुसहाल देस बनल बा। 147 देसन के एह रैंकिंग में भारत के 118वां स्थान मिलल बा। पिछलका साल एह रैंकिंग में भारत 126वां नंबर पs रहे। एह तरह भारत के रैंकिंग में आठ जगहन के सुधार भइल बा। हालांकि, चउकावे वाला बात ई बा कि एह सूची में भारत से अबकी बेर पाकिस्तान बाजी मार लेले बा। पाकिस्तान के हैप्पीनेस इंडेक्स में 109वीं रैंकिंग मिलल बा।
वेलबीइंग रिसर्च सेंटर, ऑक्सफोर्ड यूनिवर्सिटी के ओर से प्रकाशित वर्ल्ड हैप्पीनेस रिपोर्ट 2025 के अनुसार, खुसहाली खाली आर्थिक विकास से तय ना होला, बलुक एमे लोगन के आपसी भरोसा आ सामाजिक जुड़ाव बड़ भूमिका निभावत बा। रिपोर्ट के अनुसार आउर नॉर्डिक देसो एक बेर फेर खुसी के रैंकिंग में शीर्ष पs बा। फिनलैंड के अलावा, डेनमार्क, आइसलैंड आ स्वीडन शीर्ष चार में बनल बा आ एही क्रम में बा। देसन के रैंकिंग ओह जवाबन पs आधारित रहे जे लोग तब दिहल जब ओह लोगन के उनका खुद के जिनगी के रेट करे खातिर कहल गइल रहे। ई अध्ययन एनालिटिक्स फर्म गैलप आ यूएन सस्टेनेबल डेवलपमेंट सॉल्यूशन नेटवर्क के संगे साझेदारी में कइल गइल रहे।
गैलप के सीईओ जॉन क्लिफ्टन कहलें, “खुसी खाली धन भा विकास से जुड़ल नइखे- ई विश्वास, संबंध आ ई जाने के बारे में बा कि लोग राउर साथ दे रहल बा कि ना।” ऊ कहलें, “जदि हमनी के मजबूत समुदाय आ अर्थबेवस्था चाहत बानी, तs हमनी के ओह चीज में निवेश करे के चाहीं जवन वास्तव में मायने रखत बा कि माने एक-दूसरा में।
हैप्पीनेस इंडेक्स में किन देशों का दबदबा, कौन पिछड़े?
खुसन लोगन के रैंकिंग में अमेरिका अभी तक के सबसे निचला पायदान पs पहुंच गइल बा। रैंकिंग में शीर्ष 20 में यूरोपीय देसन के दबदबा बा, बाकिर कुछ अपवादो बा। हमास के संगे युद्ध के बावजूद, इस्राइल आठवां स्थान पs बा। कोस्टा रिका आ मेक्सिको पहिला बेर खुस देसन के शीर्ष 10 में सामिल भइल, ई क्रमशः छठा आ 10वां स्थान पs बा। अमेरिका एह रैंकिंग में अपना अब तक के सबसे निचिला स्थान 24वां नंबर पs पहुंच गइल बा। एकरा पहिले 2012 में ऊ 11वां स्थान पs रहे।
रिपोर्ट में कहल गइल बा कि पिछिला दु दशकन में अमेरिका में अकेले भोजन करे वाला लोगन के संख्या में 53 प्रतिशत के बढ़न्ती भइल बा। सूची में यूनाइटेड किंगडम 23वां स्थान पs बा। एह रैंकिंग में अफगानिस्तान के दुनिया के सबसे दुखी देस बतावल गइल बा। अफगान महिलन के कहनाम बा कि उनकर जिनगी विशेष रूप से कठिन बा। पश्चिमी अफ्रीका में सिएरा लियोन दूसरका सबसे दुखी देस बा, ओकरा बाद लेबनान बा, जवन नीचे से तीसरका स्थान पs बा।
दुनिया के 20 सबसे खुसहाल देस
- फिनलैंड
- डेनमार्क
- आइसलैंड
- स्वीडन
- नीदरलैंड
- कोस्टा रिका
- नॉर्वे
- इज़राइल
- लक्ज़मबर्ग
- मेक्सिको
- ऑस्ट्रेलिया
- न्यूज़ीलैंड
- स्विटजरलैंड
- बेल्जियम
- आयरलैंड
- लिथुआनिया
- ऑस्ट्रिया
- कनाडा
- स्लोवेनिया
- चेक गणराज्य
हैप्पीनेस इंडेक्स में सबसे खराब रैंकिंग
अफगानिस्तान (नंबर 147) एक बेर फेर सूची में सबसे नीचे बा। सिएरा लियोन (नंबर 146), लेबनान (नंबर 145), मलावी (नंबर 144) आ जिम्बाब्वे (नंबर 143) खुशहाली के ममिला में सबसे निचला पांच देसन में सामिल बा।
