स्पोर्ट्स डेस्क। भारत आ साउथ अफ्रीका के बीच 30 नवंबर से तीन मैच के वनडे सीरीज के पहिलका मुकाबला खेलल जाई। ई मैच रांची में होखे वाला बा, जहां दुनो टीम आमने-सामने टकराई। एह मैच में फेर से रोहित शर्मा आ विराट कोहली के खेलत देखे के मौका मिली।
टेस्ट सीरीज में मिलल करारा हार भूला के टीम इंडिया अब वनडे में जबरदस्त वापसी करे के कोसिस करी। ना खाली वापसी, बलुक पूरा सीरीज जीतला पs टीम इंडिया के नजर बा। रोहित शर्मा आ विराट कोहली मैदान पs वापसी कs लेले बा लोग। हालांकि टीम इंडिया के रेगुलर कप्तान शुभमन गिल चोट से बाहर बाड़ें।
नया कप्तान के नेतृत्व में उतरी टीम इंडिया
गर्दन में चोट लगला के कारण शुभमन गिल वनडे सीरीज से बाहर हो गइलें। उनका जगह कप्तानी के जिम्मेदारी केएल राहुल के दिहल गइल बा। रवींद्र जडेजा आ ऋतुराज गायकवाड़ के टीम में फेर से सामिल कइल गइल बा। अब देखे के ई रही कि तीन मैच के ई सीरीज कइसे आगे बढ़त बा।
India vs South Africa पहिलका ODI कहां खेलल जाई?
ई मैच रांची के जेएससीए इंटरनेशनल स्टेडियम में खेलल जाई।
कब खेलल जाई पहिलका ODI?
भारत आ साउथ अफ्रीका के बीच पहिलका वनडे 30 नवंबर, अतवार के खेलल जाई।
मैच कब सुरू होई?
मैच भारतीय समय अनुसार दोपहर 1:30 बजे सुरू होई।
भारत में लाइव टेलिकास्ट कहां देखल जा सकी?
भारत में एह मैच के लाइव प्रसारण स्टार स्पोर्ट्स नेटवर्क पs होई।
फ्री में कहां देखल जा सकी India vs South Africa पहिला ODI?
भारत आ साउथ अफ्रीका के बीच पहिलका वनडे डीडी स्पोर्ट्स पs फ्री में देखल जा सकेला। डीडी फ्री डिश वाला बिना पईसा खर्च कइले मैच देख सकत बा लोग। मैच के लाइव स्ट्रीमिंग जियोहॉटस्टार पर उपलब्ध रही।







