कण-कण शंकर के नगरी आश्विन शुक्ल प्रतिपदा पs शक्तिमय हो उठल। सोमार के अलसुबह से काशी के कोना-कोना दुर्गा सप्तशती के ओजस मंत्र से गूंज उठल। शैलपुत्री माता के दर्शन खातिर अलईपुर स्थित भगवती दरबार में अतवार रात तीसरे प्रहर से ही भक्त के कतार लग गइल।
पंचामृत स्नान, शृंगार, षोडशोपचार पूजन अउरी आरती उपरांत भोर में तीन बजे पट खुलल अउर दर्शन-पूजन शुरू भइल। श्रद्धालु लोग माता रानी के गुड़हल समेत लाल फूल के माला, मिष्ठान अउर नारियल-चुनरी अर्पित कइलें।श्रद्धालु जय माता दी के नारा लगावत देवी के दरबार में मत्था टेक कs के अपने मुराद पूरा करे खातिर प्रार्थना कइल।
घर-घर बिरजली आदिशक्ति जगदंबा
शक्ति के अधिष्ठात्री मां जगदम्बा के विविध स्वरूप के दर्शन-पूजन खातिर मंदिर में अनवरत कतार लागल बा। श्रद्धालु लोग व्रत के संकल्प लिहल। घर-घर सविधि कलश स्थापन अउरी ध्वजारोहण के संगे शक्ति के अधिष्ठात्री देवी भगवती दुर्गा के आह्वान कइल गइल। मंदिर अउरी मठ-आश्रम में भी विधि-विधान से कलश स्थापन, पूजन, देवी आवाहन कइल गइल। एकरे संगही शिव के नगरी काशी शक्ति के आराधना में डूब गइल।
