Asia Cup 2025 : टीम इंडिया के जीत के संगे सुरुआत, कप्तान हरमनप्रीत लगवलें जोरदार हैट्रिक

Share

स्पोर्ट्स डेस्क। जवना दिन देस में राष्ट्रीय खेल दिवस मनावल जात होखे, ओहि दिन भारतीय हॉकी टीम मैदान पs जीत दर्ज करे, एकरा से बेहतर शायदे कुछ होई। काहेकि भारत के महानतम हॉकी खिलाड़ी मेजर ध्यान चंद के जन्मदिन के मवका पs 29 अगस्त के खेल दिवस मनावल जाला। अइसन में भारतीय हॉकी टीम Asia Cup 2025 के अपना पहिलके मैच में रोमांचक जीत दर्ज कइलस। कप्तान हरमनप्रीत कौर के हैट्रिक के मदद से भारतीय टीम पूल-ए के अपना पहिला मैच में चीन के 4-3 से हरवलस।

सुक 29 अगस्त से बिहार के राजगीर में एशिया कप 2025 के सुरुआत भइल। ई पहिला मवका हs जब बिहार में एह टूर्नामेंट के आयोजन हो रहल बा। अइसन में एह टूर्नामेंट के लेके बहुत जादे उत्साह बनल बा। फेर टीम इंडिया के पहिला मैच जवना तरह से पूरा भइल, उ फैंस के जादे रोमांचित कs देलस। हालांकि, ओलंपिक ब्रॉन्ज मेडलिस्ट भारतीय टीम खातिर ई एगो कड़ा मुकाबला साबित भइल, जवना में जीत खातिर जूझे के पड़ल।

हरमनप्रीत के हैट्रिक से मिलल जीत

पूल-ए के एह मुकाबला में पहिलका गोल चीन के ओर से भइल, जब मैच के 12वां मिनट में पेनल्टी कॉर्नर पs डू शिहाओ खाता खोलत चीन के 1-0 के बढ़त दिलवलें। बाकिर चीन के ई बढ़त जादे देर ना टिकल आ 18वां मिनट में जुगराज सिंह भारत के 1-1 के बराबरी पs पहुंचवलें। एकरा बाद भारतीय टीम के बारी रहे आ कप्तान हरमनप्रीत सिंह आपन विस्फोटक ड्रैग फ्लिक के कमाल दिखवलें। हरमनप्रीत 20वां आ 33वां मिनट में पेनल्टी कॉर्नर में 2 गोल दगलें आ स्कोर के 3-1 कs देलें।

बाकिर चीन आसानी से हार ना मनलस आ अगिला 2 गोल करत मुकाबला के 3-3 के बराबरी पs ले आके खड़ा कइलस। तीसरका क्वार्टर के अंत 3-3 के बराबरी पs भइल आ अब भारतीय टीम के लगे जीत हासिल करे खातिर खाली आखिरी क्वार्टर माने 15 मिनट बांचल रहे। बाकिर चउथा क्वार्टर के सुरुआत गोल के संगे भइल। कप्तान हरमनप्रीत फेर पेनल्टी कॉर्नर पs 47वां मिनट में गोल दगलें आ टीम के 4-3 से निर्णायक बढ़त दिलवला के संगही आपन हैट्रिको पूरा कइलें।

Asia Cup 2025 : जापान-कोरिया के जोरदार जीत

ओहिजा, पूल ए के एगो आउर मुकाबला में जापान धमाकेदार आगाज कइलस। अपना पहिला खिताब के उम्मीद के संगे एह टूर्नामेंट में उतरल जापानी टीम एकतरफा अंदाज में कजाकिस्तान के 7-0 से रउद देलस। ओने पूल बी में अइसने नजारा देखे के मिलल, जहां साउथ कोरिया चीनी ताइपे के 7-0 से हरा देलस, जबकि पाकिस्तान के जगह टूर्नामेंट में आवे वाला बांग्लादेश के हार के सामना करे के पड़ल। मलेशिया ओकरा के 4-1 से हरवलस।

Read Also: Pakistani Terrorists in Bihar : जैश के आतंकी से शक्ल मिले के शक! एगो संदिग्ध के पुलिस पकड़लस

Share this article

Facebook
Twitter X
WhatsApp
Telegram
 
- Sponsored Ads-