मुख्यमंत्री योगी आदित्यनाथ माफिया अतीक अहमद के कब्जा से मुक्त करावल गइल जमीन पs बनल आवासन के चाबी गरीबन के सउपके भ्रष्ट तंत्र पs जवन प्रहार कइले बाड़ें, ओकर नींव छव साल पहिले रखल गइल रहे। जल्दिये कब्जा मुक्त करावल गइल आउर जमीनन पs जरूरतमंदन खातिर ओह लोगन के सपनन के घर बनी। मुख्यमंत्री माफिया आ अपराधियन के विरुद्ध अभियान के तहत कार्रवाई के निरदेस दिहल गइल रहे।
योगी अवैध कब्जा मुक्त जमीनन पs गरीबन खातिर आवास बनावल जाये के घोषणा कइले रहस। जवना के सुक के प्रयागराज में साकार कइलें मुख्यमंत्री के निरदेस पs पुलिस आ राजस्व विभाग माफिया के करिया कमाई से खड़ा कइल गइल साम्राज्य के जड़ उखाड़े खातिर लगातार कार्रवाई कइल जा रहल बा। राजस्व विभाग अभियान के तहत अलग-अलग जिलन में 66,575.75 हेक्टेयर से बेसी जमीन के कब्जा आ अतिक्रमण से मुक्त करवले बा।
एह कार्रवाई के चलते प्रदेश में 24,135 राजस्व आ 1070 सिविल वाद दर्ज भइल बा। जमीनन पs अवैध कब्जा करे वालन के विरुद्ध 4637 मुकदमा दर्ज करावल गइल बा। सब मंडलन में अभियान के तहत लगातार कार्रवाई सुनिश्चित करावल जा रहल बा। एकरा पहिले लखनऊ के पिपरसंड क्षेत्र में एगो बड़ जमीन भू-माफिया के अवैध कब्जा से मुक्त करावल गइल रहे। जवना पs केंद्रीय गृह मंत्री अमित शाह एक अगस्त, 2021 के यूपी स्टेट इंस्टीट्यूट आफ फारेंसिक साइंसेज के नींव रखले रहस।
दु हजार करोड़ रुपिया से अधिका के लागत से इंस्टीट्यूट बनके खड़ा हो चुकल बा आ इंस्टीट्यूट के पहिला शैक्षणिक सत्र 2023-24 जल्दिये सुरू होखे जा रहल बा। जवना जमीन पs कबो भू-माफिया निजी कालोनी बसावे के सपना देखत रहे, उहां अब यूपी पुलिस खातिर फारेंसिक के क्षेत्र में आगे बढ़े खातिर एगो बुलंद इमारत खड़ा बा। फारेंसिक साइंस के पढ़ाई कs के जुवा अपना सुनहरा भविष्य के ओर बढ़ी लो।
स्पेशल डीजी कानून-बेवस्था प्रशांत कुमार के मोताबिक अभियान के तहत अब तक माफिया आ ओकनी के गिरोह के सक्रिय सदस्यन से 3516 करोड़ रुपिया से जादे के संपत्तियन के जब्त, ध्वस्त आ कब्जा मुक्त करावल गइल बा। एमे 2401 करोड़ रुपिया के संपत्ति गैंगस्टर एक्ट के तहत आ 1115 करोड़ रुपिया से जादे के संपत्ति आउर कानून आ नियमन के तहत जब्त, ध्वस्त आ अवैध कब्जन से मुक्त करावल गइल बा। कुमार के कहनाम बा एमे कइयन गो बड़ सरकारी जमीनन के माफिया के कब्जा से मुक्त करावल गइल।
