लखनऊ : प्रदेश सरकार के आठ साल के कार्यकाल में मिशन रोजगार गति पकड़लस। शासन के मोताबिक एह दौरान साढ़े 7 लाख से जादे नवहन के सरकारी नौकरी दिहल गइल बा। लोक सेवा आयोग आ अधीनस्थ सेवा चयन आयोग के माध्यम से लगभग 95 हजार अभ्यर्थियन के चयन कइल गइल। मिशन रोजगार के एह गति से प्रदेश के सशक्त करे में बहुते मदद मिली।
मुख्यमंत्री योगी आदित्यनाथ भरती प्रक्रिया के पारदर्शी आ त्वरित बनावे खातिर ई-अधियाचन पोर्टल के सुरुआत कइलें। एकरा से समूह क, ख आ ग के पदन पs चयन प्रक्रिया में तेजी आइल। कोविड महामारी के दौरान सरकार भरती प्रक्रिया के जारी रखलस। लोक सेवा आयोग 1 अप्रिल 2017 से 20 मार्च 2025 तक 48593 अभ्यर्थियन के चयन कइलस। सबसे जादे अभ्यर्थियन के चयन 2019-20 में 13893 रहल आ 2024-25 में अभी ले 1918 नवहन के चयन भइल बा। एही तरे अधीनस्थ सेवा चयन आयोग 46032 अभ्यर्थियन के चयन कइलस। एमे 2022-23 में सबसे जादे 11800 नवहन के चयन कइल गइल। 2024-25 में अभी ले 6106 नवहन के अवसर मिलल बा।
प्रदेश में 75 फीसदी नवहन के मिली रोजगार
कौशल विकास मिशन नवहन के कंपनियन में सेवायोजित करावे के अभियान चला रहल बा। एकरा खातिर कंपनी से इहो सुनिश्चित करावे के प्रयास होई कि ऊ 75 फीसदी नवहन के प्रदेश में रोजगार देवे। मिशन एह संबंध में कंपनियन के निरदेस जारी कइल गइल बा। मिशन के प्रयास बा कि नवहन के ना खाली बेहतर सेवायोजन होखे, बलुक उनकरा के अच्छा मानदेय-वेतन मिले। बेवसायिक शिक्षा, कौशल विकास आ उद्यमशीलता विभाग के प्रमुख सचिव डॉ. हरिओम बतवलें कि हमनी के तीन प्रमुख योजनन पs काम सुरू कs चुकल बानी सs। एकरा तहत पहिला निरदेस सेवायोजन खातिर आवे वाला कंपनियन के दिहल गइल बा कि ऊ 75 फीसदी नवहन के प्रदेश में रोजगार दिलावे।
एकरा से एक तs हमनी के समय-समय पs जांच करावत रहेम सs। काहेकि कइयन बेर कंपनी कुछ दिन बादे नवहन के हटा देली सs। ओहिजा, 75 फीसदी नवहन के प्रदेशे में नौकरी मिलला से हमनी के अर्थबेवस्था आउर बेहतर होई। कइयन बेर कंपनी अभियो नवहन के आठ-दस हजार रुपिया महीना मानदेय-वेतन पs रखेली सs। ओकनी के निरदेस दिहल गइल बा कि नवहन के न्यूनतम 12 हजार रुपिया मासिक दिहल जावs। ताकि नवहा आपन अपना खर्च बेहतर तरीका से पूरा कs सके। कंपनियन से एकरा के सुनिश्चित करावल जाई।
स्वरोजगार पs फोकस
प्रमुख सचिव कहलें कि हमनी के प्रयास होई कि 20 फीसदी नवहन के स्वरोजगार आ उद्यमिता खातिर प्रेरित कइल जाव। एकरा के देखत कौशल विकास मंत्रालय के सुझाव दिहल गइल बा। उनका ओर से जारी होखे वाला गाइडलाइन में एकरा के सामिल कइला पs सहमति दिहल गइल बा। एही आधार पs कौशल विकास मिशन नवहन के नया-नया ट्रेड में प्रशिक्षितो कs रहल बा।
Read Also: 23 मार्च 2025 के राशिफल
