Pawan Singh: भोजपुरी स्टार पवन सिंह के बड़ खुलासा, आसनसोल से चुनाव ना लड़ला पs खोल देलें BJP के पोल

भोजपुरी स्टार पवन सिंह (Pawan Singh exposes BJP) लोकसभा चुनाव में बंगाल के आसनसोल से चुनाव ना लड़े के लेके एगो बड़ खुलासा कइले बाड़ें। लोकसभा चुनाव में BJP पवन सिंह के पश्चिम बंगाल के आसनसोल से टिकट देले रहस, बाकिर ऊ टिकट लवटा देले रहस।

आसनसोल से चुनाव लड़े के तइयार रहस 

अभी ले सभे इहे मानत रहे कि टिकट पवन सिंह लवटले रहस आ ऊ आसनसोल से चुनाव ना लड़ल चाहत रहस, बाकिर अब पवन सिंह बतवले बाड़ें कि ऊ खुद आसनसोल से चुनाव लड़े खातिर तइयार रहस। ऊ कहले रहस कि पार्टी के दबाव में ऊ टिकट वापस कइले रहस।

BJP के खोल देलें पोल

एगो पॉडकास्ट में बातचीत करत पवन सिंह बतवलें कि उनकर एगो गाना के चलते पार्टी के कुछ नेता लोग उनकर विरोध कइल, जवना के बाद बंद कमरा में कुछ नेता लोगन के संगे बातचीत के बाद ऊ आपन टिकट लवटावे के फैसला कइलें।

गाना पs विवाद के बाद दबाव

भोजपुरी स्टार कहलें कि ‘बंगाल वाली माल’ गाना पs विवाद होखला के बाद उनका से टिकट वापस करवावल गइल रहे। ऊ कहलें कि जदि आसनसोल से चुनाव ना लड़ल रहती तs ऊ पहिलही बोल देती। पवन सिंह कहलें कि टिकट मिलला के बाद उनका कुछ गाना वायरल होखे लागल रहे, खास कs के ऊ गाना जवन बंगाल से जुड़ल रहे।

एकरा बाद कुछ भाजपा नेता एहपर चिंता जतावल आ पोस्टरन के वायरल होखला के बाद पवन सिंह से टिकट वापस लेवे के कहले रहस।

काराकाट से लड़ल रहस चुनाव

भाजपा के टिकट लवटला के बाद पवन सिंह निर्दलीय बिहार के काराकाट लोकसभा सीट से चुनाव लड़ल रहस। हालांकि, उनका हार के सामना करे के पड़ल रहे।