गोरखपुर विश्विद्यालय: पत्रकारिता आ जनसंचार विभाग देस के सर्वश्रेष्ठ विभागन में भइल सामिल, आईआईआरएफ के रैंकिंग में मिलल 66 वां स्थान

गोरखपुर। आईआईआरएफ रैंकिंग में दीनदयाल उपाध्याय गोरखपुर विश्वविद्यालय,गोरखपुर के जनसंचार आ पत्रकारिता विभाग के देश के 100 सर्वश्रेष्ठ जनसंचार संस्थानन में से 66वां स्थान प्राप्त भइल बा।

विश्वविद्यालय में पत्रकारिता आ पाठ्यक्रम हिंदी विभाग के अंतर्गत संचालित बा। उल्लेख जोग बात बा कि विश्वविद्यालय में पत्रकारिता आ जनसंचार के स्नातक आ पाठ्यक्रम चल रहल बा। विभाग आ विश्वविद्यालय के एह गौरवशाली उपलब्धि पs कुलपति प्रो. पूनम टण्डन हर्ष व्यक्त करत विभाग के बधाई देले बाड़ी। ऊ कहली कि हिन्दी विभाग के ओर से संचालित जर्नलिज्म पाठ्यक्रम विश्वविद्यालय के महत्वाकांक्षी पाठ्यक्रम हs, जवन उद्यमिता,नवाचार आ विकास के भूमिका के कारण छात्रन के भविष्य निर्माण में आपन भूमिका के निर्वहन कs रहल बा।

राष्ट्रीय संस्थागत रैंकिंग फ्रेमवर्क (आईआईआरएफ) भारत में उच्च शिक्षण संस्थानन के मूल्यांकन आ वर्गीकरण करे ला एगो व्यापक रेटिंग प्रणाली के रूप में भारतीय संस्थागत रैंकिंग फ्रेमवर्क बनवले बा, जवना के आईआईआरएफ कहल जाला। छात्रन आ हितधारकन के उनकर आवश्यकतन के सर्वोत्तम रूप से पूरा करे वाला संस्थान के चुने में मदद करे खातिर, ई कइयन मानदंडन के आधार पs संस्थानन के वस्तुनिष्ठ रेटिंग देवे के प्रयास करत बा।

हिंदी आ पत्रकारिता विभाग के अध्यक्ष प्रो. दीपक प्रकाश त्यागी बतवलें कि हिंदी विभाग के अंतर्गत पत्रकारिता के पढाई 1996 में एक साल के स्नातक पाठ्यक्रम से सुरू भइल रहे आ अब एह विषय में स्नातक आ स्नातकोत्तर पाठ्यक्रम सफलतापूर्वक संचालित बा। प्रो. त्यागी बतवलें कि एह विभाग के कइयन विद्यार्थी अलग-अलग मीडिया संस्थानन में कार्यरत बा।

पत्रकारिता पाठ्यक्रम के समन्वयक प्रो. राजेश कुमार मल्ल एकरा के गौरवशाली उपलब्धि बतवलें आ कहलें कि विभाग के ई उपलब्धि विश्वविद्यालय के नैक रैंकिंग में प्रदेश के सर्वश्रेष्ठ विश्वविद्यालय होखे के पुष्टि करत बा। विभाग के एह उपलब्धि पs सब शिक्षक लोग प्रसन्नता व्यक्त कइले बा लो।