लाइफस्टाइल डेस्क। पिछिला कुछ साल में टूरिज्म में बड़ बदलाव देखे के मिलल बा। पहिले जहां वेकेशन के मतलब गोवा के बीच आ पहाड़न के सैर होत रहे, ओहिजा अब स्पिरिचुअल टूरिज्म एगो बड़ ट्रेंड के रूप में ऊभर के सामने आइल बा। अइसे दिलचस्प बात ई बा कि ई ट्रेंड बुजुर्गन में ना, बलुक नवहन में देखे के मिलत बा।
ऋषिकेश के गंगा आरती होखे, केदारनाथ के मुश्किल चढ़ाई आ वाराणसी के घाट, हर जगह नवहन के भारी मवजूदगी ई सोचे पs मजबूर करेला कि आखिर तकनीक आ चकाचौंध के दुनिया में रहे वाला जुवा अध्यात्म के ओर काहें खिंचल जात बा? आई जानल जावs काहे जुवा के स्पिरिचुअल टूरिज्म पसंद आ रहल बा।
का जेन-जी के पसंद आ रहल बा स्पिरिचुअल टूरिज्म?
मानसिक शांति के तलाश- आज के भाग-दउड़ भरल जिनगी, करिअर के प्रेशर आ सोशल मीडिया के कबो ना खतम होखे वाला दउड़ जुवा में तनाव आ बर्नआउट बढ़ा दिहल। अइसन में आध्यात्मिक स्थल ओह लोगन के शांति के अहसास करवावेला। स्मार्टफोन के स्क्रीन से दूर, प्रकृति के गोद में आ मंत्र कs के गूंज के बीच बितावल गइल समय ओह लोगन के खातिर एगो डिजिटल डिटॉक्स के तरे काम करेला, जवना से ओकरा मानसिक सुकून मिलेला।
खुद के खोज- आज के जुवा खाली दुनिया ना देखल चाहेला, बलुक ऊ खुद के समझल चाहत बा। स्पिरिचुअल टूरिज्म ओह लोगन के आत्म-चिंतन के मवका देला। जाेग, ध्यान आ प्राचीन मंदिर के वास्तुकला ओकरा अपना जड़ से जोड़ेला। ई खाली भगवान के दर्शन तक सीमित नइखे, बलुक खुद के तलाशे के एगो जरिया बन रहल बा।
ऑफ-बीट आ एडवेंचर के मेल- आजकल के जुवा खातिर स्पिरिचुअल टूरिज्म खाली मंदिर जाये जइसने ना हs; एमे एडवेंचर क तड़का सामिल बा। केदारनाथ, तुंगनाथ आ अमरनाथ जइसन जगहन के जतरा में मुश्किल ट्रेकिंग आ प्राकृतिक सुंदरता के मेल होला। मुश्किल रास्ता के पार कs के जब ऊ मंजिल पs पहुंचेला लोग, तs ऊ अनोखा अहसास होला। थ्रिल आ फेथ के ई कॉम्बिनेशन जुवा के खूब आकर्षित करत बा।
सोशल मीडिया आ विजुअल अपील- इंस्टाग्राम आ यूट्यूब जइसन प्लेटफॉर्म्स एह ट्रेंड के बढ़ावा देला। जब हमनी के सुंदर पहाड़ के बीच इस्थित प्राचीन मंदिर आ भव्य आरती के वीडियो देखेनी सs, तs ओइसने अनुभव करे के इच्छा जागेला। संगही, धार्मिक स्थल के पॉजिटिविटी जुवा के खूब भावत बा।
