बॉलीवुड अभिनेता राजपाल यादव एह इंडस्ट्री के बेहतरीन कलाकारन में से एक हउवें. ऊ फिलिमन में हास्य भूमिका निभाव के लोगन के दिल में अपना खातिर एगो खास जगह बनवले बाड़न. एकरा संगे-संगे अब उ मुसीबत में देखाई देताने। अब इंदौर पुलिस अभिनेता के 20 लाख रुपया के घपला करे के आरोप में नोटिस जारी क देले बिया। उनुका 15 दिन के भीतर पुलिस के सोझा पेश होखे के होई।
20 लाख के धोखाधड़ी के आरोप
बिल्डर सुरिंदर सिंह पुलिस के शिकायत देले रहले कि राजपाल यादव के अपना बेटा के फिल्म इंडस्ट्री में सपोर्ट अवुरी प्रोमोट करे खाती 20 लाख रुपया लेले बाड़े। लेकिन अब तक बेटा के कवनो काम ना मदद मिलल बा। जब उनुका से पईसा वापस देवे के कहल गईल त उ गायब हो गईले। अब उ ना त फोन उठावत बाड़े ना पईसा लौटावत बाड़े। ए सभ से परेशान बिल्डर तुकोगंज पुलिस के शिकायत देले रहे।
नोटिस के जवाब 15 दिन में देवे के होई
शिकायत दर्ज होखते पुलिस तुरंत प्रभाव से जांच शुरू क देलस। अब अभिनेता के खिलाफ नोटिस जारी क के 15 दिन बाद पेश होखे के कहल गईल बा। मामला के जांच करेवाला सब इंस्पेक्टर ललन मिश्र बतवले कि सुरिंदर सिंह पछिला सप्ताह ए मामला के शिकायत देले रहले। एही के आधार प अभिनेता के नोटिस जारी कईल गईल बा अवुरी उनुका से 15 दिन में जवाब देवे के कहल गईल बा।
