खेलो इंडिया बालिका लीग खो-खो प्रतियोगिता के होई आयोजन: गोपालगंज में खिलाड़ियन के भइल आगमन, माला पहिनाके भव्य स्वागत भइल

गोपालगंज: खेलो इंडिया बालिका लीग खो-खो (सब जूनियर आ जूनियर) प्रतियोगिता के आयोजन गोपालगंज जिला में 28 दिसंबर से 30 दिसंबर तक होखे जा रहल बा। एह आयोजन खातिर कर्नाटक आ बिहार राज्य के खिलाड़ियन के आगमन हो चुकल बा।जिलाधिकारी प्रशांत कुमार सी एच के निर्देशानुसार, खिलाड़ियन के आवागमन खातिर वाहनन के बेवस्था कइल गइल आ संबंधित अधिकारियन के प्रतिनियुक्ति कइल गइल।

स्वागत समारोह

कर्नाटक आ बिहार के खिलाड़ियन आउर उनका दल प्रभारियन के माल्यार्पण आ तिलक लगाके स्वागत कइल गइल। एह अवसर पs वरिष्ठ कोषागार पदाधिकारी शशिकांत आर्य आ जिला कार्यक्रम पदाधिकारी सर्व शिक्षा अभियान राजन कुमार अपना टीम के संगे मवजूद रहे।

गोपालगंज रेलवे स्टेशन पs गुजरात राज्य के टीम के स्वागत डीपीएम जीविका प्रियंका गुप्ता, जिला कार्यक्रम पदाधिकारी मध्याह्न भोजन बृजेश कुमार, शारीरिक शिक्षक अंजनी कुमार सिंह, मुकेश कुमार आदि कइल लो।

ओहिजा, नई दिल्ली राज्य के टीम के सिवान स्टेशन पs स्वागत कइल गइल, जहां शारीरिक शिक्षक राजीव कुमार सिंह आ प्रवीण कुमार शाही खिलाड़ियन पs पुष्प वर्षा कइल लो आ उनका के बस से आवास स्थल तक ले आवल गइल।

एह प्रतियोगिता के आयोजन महानिदेशक-सह-मुख्य कार्यकारी अधिकारी, बिहार राज्य खेल प्राधिकरण पटना, खो-खो एसोसिएशन ऑफ बिहार आ जिला प्रशासन गोपालगंज के संयुक्त तत्वावधान में कइल जा रहल बा। एमे महाराष्ट्र, बिहार, ओडिशा, कर्नाटक, दिल्ली, मध्य प्रदेश, पंजाब, वेस्ट बंगाल, गुजरात जइसन राज्यन के टीमन के खिलाड़ी भाग ले रहल बा लो। प्रतियोगिता के आयोजन मिंज स्टेडियम में कइल जाई। ई आयोजन गोपालगंज में खेलन के बढ़ावा देवे आ नवहन के खेल के प्रति प्रेरित करे खातिर एगो महत्वपूर्ण कदम मानल जा रहल बा।