नुपुर शर्मा के ए टिप्पणी के लेके बियफे का दिने झारखंड के रांची में भईल हिंसा में करीब 10 लोग घाही हो गईले। अब खबर बा कि एह हिंसा में घवाहिलन में से दू गो के शनिचर का दिने मौत हो गइल. मरेवाला के पहचान मुदस्सर उर्फ कैफी के रूप में भईल बा। जबकि दूसरा के नाम मोहम्मद साहिल बा। दुनो लोग के मौत के रिम्स अस्पताल प्रशासन से पुष्टि भईल बा। अस्पताल प्रशासन के कहना बा कि घवाहिलन के एहिजा भरती करावल गइल बा जवना में दू जने के मौत हो गइल. हिंसा के दौरान दुनो लोग के गोली लागल रहे। आठ लोग के अबहियो इलाज चलत बा.
सीएम कहले कि हिंसा चिंता के विषय बा
राज्य में भईल हिंसा के बाद झारखंड के मुख्यमंत्री हेमंत सोरेन के बयान चर्चा में आईल बा। उ कहले कि, इ घटना निश्चित रूप से हमनी खाती चिंता के विषय बा। राज्य के लोग संयम बना के राखे के चाही अवुरी कवनो प्रकार के अपराध में ना लीन होखे के चाही। सोरेन कहले कि, हमनी के ए समय कड़ा परीक्षा से गुजरतानी, लेकिन हमनी के धैर्य खोवे के जरूरत नईखे।
पूरा राँची में कर्फ्यू लगा दिहल गइल
रांची में होखत हिंसक विरोध प्रदर्शन के देखत पूरा शहर में कर्फ्यू लगावल गईल बा। एकरा से पहिले इहाँ के मात्र कुछ इलाका में कर्फ्यू के घोषणा कईल गईल रहे। एही बीच रांची में भईल भयंकर विरोध के देखत 11 जून के सबेरे 6 बजे तक तमाम इंटरनेट सेवा अस्थायी तौर प बंद क दिहल गईल।
एसएसपी, सपा सिटी, डीएसीपी अउरी पुलिसकर्मी घायल
झारखंड में प्रदर्शन के दौरान एसएसपी, सपा सिटी, डीएसपी सिटी, डेली मार्केट थाना प्रभारी समेत स्थिति के काबू में करेवाला कुछ अवुरी पुलिसकर्मी घाही हो गईले। खबर के मुताबिक 11 पुलिसकर्मी अवुरी 12 प्रदर्शनकारी घाही हो गईले। उनकर अलग अलग अस्पताल मे ईलाज चलत बा । झारखंड पुलिस के मुताबिक फिलहाल स्थिति काबू में बा। बल तैनात कर दिहल गइल बा. आईजी, पुलिस अधीक्षक, डीएसपी समेत वरिष्ठ पुलिस अधिकारी इलाका में डेरा डालत बाड़े।
