गोरखपुर। हर जरूरतमंद के संगे आत्मिक संवेदना रख के पूरा मदद देवे के संकल्पित मुख्यमंत्री योगी आदित्यनाथ बियफे के दिवंगत पत्रकार विवेक अस्थाना के परिवार के आर्थिक सहारा देलें। मुख्यमंत्री स्वर्गीय विवेक अस्थाना के पत्नी आ उनकर दुन्नो लइकन के मुख्यमंत्री विवेकाधीन कोष से पांच लाख रुपिया के आर्थिक सहायता के चेक सउपलें आ भरोसा देलें कि दुख के एह घड़ी में सरकार आ ऊ खुद परिवार के संगे खड़ा बाड़ें।
गोरखपुर जर्नलिस्ट्स प्रेस क्लब के आजीवन सदस्य, वरिष्ठ पत्रकार आ रंगकर्मी विवेक अस्थाना के पांच जनवरी के दिल के दौरा (हृदयाघात) से निधन हो गइल रहे। ऊ परिवार के अकेला कमाई करे वाला सदस्य रहलें। परिवार के मदद खातिर गोरखपुर जर्नलिस्ट्स प्रेस क्लब के ओर से बुध के दुपहरिया बाद मुख्यमंत्री योगी आदित्यनाथ के प्रार्थना पत्र दिहल गइल रहे। मुख्यमंत्री एकरा पs तुरंत संवेदना जतवलें आ मात्र 19 घंटा के भीतर परिवार तक आर्थिक सहायता पहुंच गइल।
बियफे के सबेरे मुख्यमंत्री योगी आदित्यनाथ, गोरखनाथ मंदिर के बैठक कक्ष में विवेक अस्थाना के पत्नी निहारिका आ दुन्नो लइकन दिव्य आ देव से मुलाकात कइलें। मुख्यमंत्री परिवार के दुख साझा कइलें आ ढाढ़स बंधवलें। एह मौका पs ऊ पांच लाख रुपिया के आर्थिक सहायता के चेक सउपलें। सीएम योगी लइकन से पढ़ाई-लिखाई के बारे में पूछलें आ पूरा मन लगा के पढ़े खातिर प्रेरित कइलें।
मुख्यमंत्री परिवार के इहो भरोसा देलें कि आगहूं सरकार हर संभव मदद करी। ऊ कहलें कि दुख के एह समय में सरकार परिवार के अकेला ना छोड़ी। एह दौरान भाजपा के प्रदेश उपाध्यक्ष आ एमएलसी डॉ. धर्मेंद्र सिंह, विधायक प्रदीप शुक्ल, सीडीओ शाश्वत त्रिपुरारी आ एडीएम वित्त आ राजस्व विनीत कुमार सिंह सहित कइयन गो वरिष्ठ अधिकारी आ जनप्रतिनिधि मौजूद रहे लोग।
Read Also: Gorakhpur Fire News : गोरखपुर सेल टैक्स भवन में भीषण आग, पूरा दफ्तर जल के राख
