कांग्रेस के पूर्व बिहार प्रदेश अध्यक्ष अनिल शर्मा पार्टी से इस्तीफा दे देले बाड़ें। ऊ राष्ट्रीय अध्यक्ष मल्लिकार्जुन खड़गे के पत्र लिखके कांग्रेस के सदस्यता से इस्तीफा देले बाड़ें। कहलें कि कांग्रेस आ राजद के गठबंधन पार्टी खातिर हानिकारक बा। तेजस्वी यादव के ताकतवर होखला से जंगलराज के बिहार में वापसी होई।
अनिल शर्मा आगे कहलें कि अध्यादेश फाड़े वाला राहुल गांधी आज लालू प्रसाद के संगे गलबहियां कs रहल बाड़ें। मटन भात खा रहल बाड़ें। दिल्ली में संविधान बचाओ रैली बा, बाकिर सोनिया गांधी के टेकओवर कइला के बाद आंतरिक संविधान खतम हो गइल बा।
खड़गे एगो बेचारा अध्यक्ष, पार्टी में उनकर ना चलेला
पूर्व प्रदेश अध्यक्ष कहलें कि मल्लिकार्जुन खड़गे एगो बेचारा अध्यक्ष हवे। उनकर पार्टी में ना चलेला। ऊ रिमोट कंट्रोल से चल रहल बाड़ें। राहुल गांधी के कश्मीर में मोहब्बत के दोकान खोले के चाहीं, काहेकि उहां एगो समुदाय आतंक मचवले रहेला। उहां मोहब्बत के दोकान खोलस।
महागठबंधन के 4-5 सीट आ गइल तs तेजस्वी के जंगलराज आ जाई
अनिल शर्मा कहलें कि दिल्ली में जब तक राहुल-सोनिया रही लो, बिहार में लालू-तेजस्वी के संगे गठबंधन बनल रही।अनिल शर्मा इहो कहलें कि अगर लोकसभा में महागठबंधन के 4-5 गो सीट आ गइल तs तेजस्वी के जंगलराज आ जाई। राम लला के आमंत्रण ठुकरावल सांप्रदायिक सोच के देखावत बा।
कांग्रेस के कथनी करनी में फरक
ऊ कहलें कि पप्पू यादव के महिमा मंडित कइल गइल। एकरा पहिले राहुल गांधी यूथ कांग्रेस में नियम बनवले रहस कि जे केहू पs कवनो आपराधिक ममिला दर्ज होई, ओकरा के पार्टी में जगह ना दिहल जाई। 1985 में कांग्रेस के सदस्यता लेले रहनी। 1998 में जनता दल गठबंधन के विरोधी रहल बानी। ओहि, समय से कांग्रेस वोटकटवा पार्टी हो गइल। राबड़ी देवी के सरकार में नर संहार भइल। बिहार में जंगलराज के पनपे देवे में कांग्रेस के बड़ी भूमिका रहल बा।
साभार : दैनिक भास्कर
