झारखंड विधानसभा चुनाव 2024 : BJP ने जारी की उम्मीदवारों की पहली List, बाबूलाल मरांडी धनवार से मैदान में

By khabar Bhojpuri Desk On Oct 19, 2024

नई दिल्ली : झारखंड विधानसभा चुनाव के लेके भारतीय जनता पार्टी (बीजेपी) आपन पहिला सूची जारी कs देले बा। पार्टी के प्रदेश अध्यक्ष बाबूलाल मरांडी धनवार क्षेत्र से चुनावी मैदान में उतरिहें। चंपाई सोरेन सरायकेला, लोबिन हेंब्रम बोरियो, सीता सोरेन जामताड़ा, गीता कोड़ा जगन्नाथपुर आ गीता बालमुचू चाईबासा से चुनाव लड़िहें।

पूर्व मुख्यमंत्री अर्जुन मुंडा के पत्नी मीरा मुंडा पोटका से आपन किस्मत अजमइहें। एकरा संगही, चंपाई सोरेन के बेटा बाबूलाल सोरेन के घाटशिला से उम्मीदवार बनावल गइल बा। पूर्व मुख्यमंत्री आ ओडिशा के राज्यपाल रघुवर दास के बहू पूर्णिमा दास के पार्टी टिकट देले बिया आ ऊ जमशेदपुर पूर्वी से चुनावी लड़ाई में सामिल होइहें।

रांची सीट पs चल रहल अटकलन पs विराम लगावत पार्टी सीपी सिंह के फेर से उम्मीदवार बनावे के निर्णय लेले बिया। ऊ रांची विधानसभा सीट से चुनावी दउड़ में होइहें। एही तरे तरह, नवीन जायसवाल हटिया क्षेत्र से बीजेपी के उम्मीदवार के रूप में मैदान में उतरिहें।

बरकट्ठा से अमित यादव के पार्टी उम्मीदवार के रूप में चुनले बिया, जे चुनाव के घोषणा के ठीक पहिले बीजेपी में सामिल भइल रहस। एकरा अलावे, भाजपा में सामिल भइल मंजू देवी के जमुआ से आ कमलेश सिंह के हुसैनाबाद से टिकट दिहल गइल बा।

एह सूची में बीजेपी 66 प्रत्याशिन में 12 महिला लोगन के सामिल कइले बिया। एमे कोडरमा से नीरा यादव, निरसा से अपर्णा सेनगुप्ता, झरिया से रागिनी सिंह, जमुआ से मंजू देवी, गांडेय से मुनिया देवी, सिंदरी से तारा देवी, पोटका से मीरा मुंडा, जमशेदपुर पूर्वी से पूर्णिमा दास साहू, चाईबासा से गीता बालमुचू, जगन्नाथपुर से गीता कोड़ा, जामताड़ा से सीता सोरेन आ छतरपुर से पुष्पा देवी सामिल बा।