OP Soni Arrested: पंजाब के पूर्व डिप्टी CM गिरफ्तार, भ्रष्टाचार के ममिला में पंजाब विजिलेंस कइलस कार्रवाई

विजिलेंस ब्यूरो पंजाब के पूर्व उप मुख्यमंत्री ओम प्रकाश सोनी के खिलाफ आय से अधिक संपत्ति के ममिला में जांच पूरा होखे के बाद केस दर्ज कs के अतवार के रात के उनका के गिरफ्तार कs लेलस।

विजिलेंस ब्यूरो के मोताबिक पूर्व मुख्यमंत्री साल 2016 से लेके साल 2022 तक आय से अधिक संपत्ति अर्जित कइलें। ब्यूरो के अधिकारी बतवलें कि पूर्व उपमुख्यमंत्री के एक अप्रिल 2016 से 31 मार्च 2022 तक कुल आय 4,52,18,771 रुपिया रहे, जबकि उनका ओर से 12,48,42,692 रुपिया खर्च कइल गइल। सोनी अपना आय से 7,96,23,921 रुपिया माने 176.08 प्रतिशत खर्च कइले रहस।

ऊ बतवलें कि एह दौरान सोनी अपना पत्नी सुमन सोनी आ बेटा राघव सोनी के नाम पs संपत्ति बनवलस। गौर करे वाला बात बा कि ब्यूरो पिछला कुछ समय से पूर्व उप मुख्यमंत्री ओम प्रकाश सोनी के संपत्ति के जांच करत रहें।

चंडीगढ़ से इहां पहुंचल विजिलेंस के टीम उनकर होटल आ आउर जगह पs चल रहल निर्माण के पैमाइशो कइले रहे। एह सब के जांच पूरा होखे के बाद विजिलेंस ब्यूरो अतवार के ओम प्रकाश सोनी के खिलाफ ममिला दर्ज कs लेलें।