स्पाेर्टस् डेस्क : भारत के कइयन गो क्रिकेटर्स एह दिनन चरचा में बा लो। सबसे पहिले युजवेंद्र चहल आ धनश्री के नाम सुर्खियन में आइल रहे। मीडिया रिपोर्ट्स में ई अटकल लगावल जात रहे कि दुनो अलग हो रहल बा आ तलाक लेवे जा रहल बा। हालांकि, अभी ले अइसन कुछ ना भइल रहे। एकरा बाद मनीष पांडे आ उनकर पत्नी आश्रिता शेट्टी के अलग होखला के खबर सामने आइल रहे। मीडिया रिपोर्ट्स में अइसन दावा कइल गइल रहे कि दुनो इंस्टाग्राम से एक-दूसरा के संगे तस्वीर हटा देले बा लो। अब भारत के दिग्गज क्रिकेटर वीरेंद्र सहवाग चरचा में बा। हिंदुस्तान टाइम्स के एगो रिपोर्ट में ई बतावल गइल बा कि सहवाग आ उनकर पत्नी आरती बियाह के 20 साल बाद एक-दूसरा से अलग हो सकत बा।
2004 में भइल रहे सहवाग आ आरती के बियाह
सहवाग आ आरती के बियाह 2004 में भइल रहे। रिपोर्ट में दावा कइल गइल रहे कि दुनो इंस्टाग्राम पs एक-दूसरा के अनफॉलो कs देले बा। ई ओह लोगन के रिश्तन में दरार के अटकलन के बढ़ावा देले बा। परिवार से जुड़ल सूत्रन के हवाले से हिंदुस्तान टाइम्स बतवलस कि दुनो पिछलका कइयन महीनन से एक-दूसरा से अलग रह रहल बा लो। अपना विस्फोटक बल्लेबाजी शैली खातिर जानल जाये वाला सहवाग आ आरती के दुगो बेटा- आर्यवीर आ वेदांत। आर्यवीर के जन्म 2007 में आ वेदांत के जन्म 2010 में भइल रहे। एतना ना एह रिपोर्ट के बाद फैंस के प्रतिक्रिया सामने आ रहल बा। फैंस के कहनाम बा कि दिवाली सेलिब्रेशन के दौरान सहवाग अपना बेटन आ अपना मां के संगे फोटोज सोशल मीडिया पs शेयर कइलें, बाकिर आरती के कवनो जिकिर भा तस्वीर ना लउकल। ई चुप्पी अफवाहन के आउर हवा दे देलस।
हिंदुस्तान टाइम्स के मोताबिक, दु हफ्ता पहिले सहवाग पलक्कड़ में विश्व नागाक्षी मंदिर के दौरा कइले रहस आ अपना इंस्टाग्राम अकाउंट पs यात्रा से तस्वीर साझा कइले रहस। हालांकि, पोस्ट में आरती के कवनो जिकिर ना रहे। ई भारतीय क्रिकेट आइकन अभी तक कवनो आधिकारिक बयान जारी नइखन कइलें, बाकिर दुनो के बीच दूरी उनका फॉलोअर्स के बीच चरचा के विषय बन गइल बा। नई दिल्ली के रहे वाली आरती अहलावत बहुत हद तक लो प्रोफाइल मेंटेन करेली। हिंदुस्तान टाइम्स के रिपोर्ट के मोताबिक, आरती अपना इंस्टाग्राम प्रोफाइल के प्राइवेट मोड पs कs लेले बाड़ी आ खाली फॉलोअर्स उनकर प्रोफाइल देख सकत बा लो, जवन कि पहिले पब्लिक रहे। हालांकि, आरती के नाम में अभियो सहवाग से जुड़ल बा। आरती के जन्म 16 दिसंबर, 1980 के भइल रहे। आरती दिल्ली विश्वविद्यालय के मैत्रेयी कॉलेज से कंप्यूटर साइंस में डिप्लोमा पूरा करे से पहिले लेडी इरविन सेकेंडरी स्कूल आ भारतीय विद्या भवन से आपन शिक्षा प्राप्त कइली।
2000 के दशक में भइल रहे सहवाग-आरती के लव स्टोरी के शुरुआत
दुनो के लव स्टोरी 2000 के दशक के सुरुआत में भइल रहे। साल 2004 में पूर्व वित्त मंत्री अरुण जेटली के आवास पs दुनो बियाह कइले रहे लो। एह कपल के क्रिकेट में सबसे मजबूत आ क्यूट कपल में से एक मानल जाला। सहवाग क्रिकेट के प्रतिबद्धतन के बीच अपना पारिवारिक जिनगी के संतुलित रखत रहल बाड़ें। हालांकि, हिंदुस्तान टाइम्स के सूत्रन के दावा बा कि उनकर रिश्ता अब पहिले जइसन नइखे रहल।
सहवाग 2015 में अंतरराष्ट्रीय क्रिकेट के कहले रहस अलिवदा
सहवाग 2015 में अंतरराष्ट्रीय क्रिकेट से संन्यास लेले रहस आ तब से ऊ अलग-अलग भूमिकन में रहलें। एमे राष्ट्रीय डोपिंग रोधी एजेंसी के डोपिंग रोधी अपील पैनल के सदस्य के रूप में काम कइल सामिल बा। ऊ आईपीएल में कोच के भूमिको निभा चुकल बाड़ें। उनकर नाम कइयन बेर भारतीय टीम के कोच बनला से जुड़ल, बाकिर सहवाग हर बार एह अटकलन के खंडन कइलें। ऊ बोललें कि अभी ऊ एह जिम्मेदारी के नइखन लिहल चाहत, बाकिर भविष्य के बारे में उनका पता ना रहे। हालांकि, ना तs सहवाग आ ना आरती अभी तक कवनो घोषणा कइले बा लो।
Read Also: Mahakumbh 2025 : सीएम योगी आज परखिहें मौनी स्नान आ प्रधानमंत्री के कार्यक्रम के तइयारी, ई बा शेड्यूल
