स्पाेर्ट्स डेस्क: रॉयल चैलेंजर्स बेंगलुरु के स्टार बल्लेबाज विराट कोहली सानदार फॉर्म में नजर आ रहल बाड़ें। ऊ अतवार के दिल्ली कैपिटल्स के खिलाफ दमदार अर्धशतकीय पारी खेलके अपना टीम के जीत दिलवलें। एह मैच में किंग कोहली कइयन गो उपलब्धि हासिल कइलें। ऊ कवनो एगो टीम के खिलाफ सबसे जादे रन बनावे वाला दूसरका बल्लेबाज बन गइलें।
विराट हासिल कइलें बड़ उपलब्धि
सलामी बल्लेबाज विराट कोहली दिल्ली खातिर मुसीबत साबित भइलें। ऊ 47 गेना में चार चौका के मदद से 51 रन बनवलें आ अपना टीम के जीत के दहलीज पs पहुंचवलें। दहिना हाथ के बल्लेबाज सत्र के छठा आ अपना करिअर के 61वां अर्धशतक एह मुकाबला में पूरा कइलें। एही के संगे विराट कवनो एगो टीम के खिलाफ आईपीएल में सबसे जादे रन बनावे वाला दूसरका बल्लेबाज बन गइलें। दिल्ली के खिलाफ कोहली 1130 रन बनवलें बाड़ें। एह ममिला में शीर्ष पs डेविड वॉर्नर बाड़ें, जे पंजाब किंग्स के खिलाफ 1134 रन बनवले बाड़ें। कोहली अब वॉर्नर के रिकॉर्ड तुरला से मात्र पांच रन दूर बाड़ें।
आईपीएल में कवनो एगो टीम के खिलाफ सबसे जादे रन बनावे वाला बल्लेबाज
| बल्लेबाज | रन | विपक्षी टीम |
|---|---|---|
| डेविड वॉर्नर | 1134 | पंजाब किंग्स |
| विराट कोहली | 1130 | दिल्ली कैपिटल्स* |
| विराट कोहली | 1104 | पंजाब किंग्स |
| डेविड वॉर्नर | 1093 | कोलकाता नाइट राइडर्स |
| विराट कोहली | 1084 | चेन्नई सुपर किंग्स |
| रोहित शर्मा | 1083 | कोलकाता नाइट राइडर्स |
दिल्ली के खिलाफ सबसे जादे 50+ स्कोर बनावे वाला बल्लेबाज बनलें विराट
मवजूदा सत्र में लक्ष्य के पीछा करत विराट कोहली चउथा बेर 50 से जादे रन के पारी खेललें। ऊ एकरा पहिले पंजाब किंग्स के खिलाफ 54 गेना में 73 रन के नाबाद पारी खेलले रहस। एकरा अलावा 36 साल के बल्लेबाज राजस्थान के खिलाफ 62 आ कोलकाता नाइट राइडर्स के खिलाफ 59 रन के नाबाद पारी खेलले रहस। एह मैच में विराट एगो आउर उपलब्धि हासिल कs लेलें। ऊ आईपीएल में कवनो एगो टीम के खिलाफ सबसे जादे 50+ स्कोर बनावे वाला बल्लेबाज बन गइलें। ऊ दिल्ली कैपिटल्स के खिलाफ 11वां बेर 50 से जादे रनन के पारी खेलले। एह ममिला में पूर्व कप्तान डेविड वॉर्नर के पीछे छोड़ देलें, जे आरसीबी के खिलाफ 10 बेर ई कारनामा कइले रहस। हालांकि, एह ममिला में वॉर्नर शीर्ष पs बाड़ें, जे पंजाब किंग्स के खिलाफ 13 बेर 50 से ज्यादा रन बनवले बाड़ें।
मैच में का भइल रहे?
क्रुणाल पांड्या आ विराट कोहली के शतकीय साझेदारी के बदौलत रॉयल चैलेंजर्स बेंगलुरु दिल्ली कैपिटल्स के छव विकेट से हराके सत्र के सातवां जीत दर्ज कइलस। ओहिजा, ई ओकरा घर से बाहर लगातार छठा जीत हs। एह मैच में टॉस हारके पहिले बल्लेबाजी करे उतरल दिल्ली कैपिटल्स 20 ओवर में आठ विकेट खोके 162 रन बनवलस। जवाब में आरसीबी 18.3 ओवर में चार विकेट खोके 164 रन बनवलस आ मुकाबला अपना नावे कs लेलस। दिल्ली खातिर अक्षर पटेल दु आ दुष्मंथा चमीरा एक विकेट लिहल लो।
Read Also: वेटिंग टिकट के साथे स्लीपर आ एसी कोच में नाहीं हो पाई यात्रा, 1 मई से सख्त हो जाई नियम
