बेमेतरा सांप्रदायिक हिंसा के बाद आजु विश्व हिन्दू परिषद आ बजरंग दल के बैनर तले छत्तीसगढ़ बंद के आह्वान गइल बा। राजधानी रायपुर में सबेरे से बंद के असर देखाई देवे लागल बा। भाजपा समेत बहुत संगठन चौक पे घूमत-फिरत दोकान बंद करावत बाड़े। एही बीच न्यू बस स्टैंड पे बस के तोड़फोड़ होखे के खबर बा। बंद के दौरान कुछ गाड़ी के तोड़फोड़ भी भईल बा। एकरा संगे बहुत दल भी बंद के समर्थन कईले बाड़े। एहतियात के तौर पे सभ चौक चौराहा पे पुलिस बल के तैनाती कईल गईल बा अउरी पुलिस बल भी गश्त करतिया। बंद के ध्यान में राखत सुरक्षा के कड़ा इंतजाम कईल गईल बा। लेकिन ए बीच पुलिस से झड़प के खबर भी बा।
रायपुर के भाटागांव बस स्टैंड पे पुलिस से टक्कर
छत्तीसगढ़ बंद के दौरान राजधानी रायपुर के भाटागांव बस स्टैंड पे भाजपा कार्यकर्ता अउरी पुलिस के बीच झड़प होखे के खबर भी आईल बा। बंद के देखत रायपुर के सभ स्कूल में छुट्टी घोषित क दिहल गईल बा। छत्तीसगढ़ के बेमेतरा में एगो युवक के मॉब लिंचिंग के विरोध में आज रायपुर में VHP कार्यकर्ता रैली निकाल के लोग से आपन कारोबार बंद राखे के निहोरा कईले। रायपुर के एडिशनल एसपी बतवले कि VHP अउरी बजरंग दल के ओर से बोलावल बंद के देखत 400 से जादे पुलिसकर्मी के तैनात कईल गईल बा। कानून व्यवस्था के स्थिति पे नजर राखल जाता। हमनी के जानकारी मिलल बा कि उ लोग 3-4 जगह चक्का के ब्लॉक करे के योजना बनावत बाड़े, हमनी के कोशिश करब जा कि जल्दी से जल्दी ओ लोग के तितर-बितर क दिहल जाए।
