Lucknow News: प्रदेश में मुजफ्फरनगर के खतौली विधानसभा में अब रामपुर के जइसने 5 दिसम्बर के उपचुनाव खातिर मतदान होई, जबकि नतीजा 8 दिसम्बर के आई। निर्वाचन आयोग उपचुनाव के लेक मंगर के तारीख के घोषणा कइलस।
निर्वाचन आयोग बतवलस कि विधायक विक्रम सिंह के विधायकी से अयोग्य घोषित कइल गइला के वजह से एह सीट प उपचुनाव हो रहल बा। आयोग बतवलस कि 10 नवम्बर के अधिसूचना, 17 नवम्बर तक नामांकन, 18 नवम्बर के नामांकन पत्रन के जांच, 21 नवम्बर तक नामांकन वापस लिहल जा सकत बा। ओहिजा 5 दिसम्बर के मतदान होई। एकरा अलावे 8 दिसम्बर के मतगणना होई। आयोग कहलस कि एह विधानसभा सीट प 10 दिसम्बर तक उपचुनाव सम्पन्न हो जाये के चाहीं।
एकरा पहिले यूपी विधानसभा सचिवालय मुजफ्फरनगर के खतौली विधानसभा सीट के रिक्त घोषित क देले रहे। प्रमुख सचिव विधानसभा प्रदीप दुबे एकर अधिसूचना जारी कइले रहस।
असल में आजम खां के तीन बरिस की सजा के बाद रालोद अध्यक्ष जयंत चौधरी हाले में खतौली सीट प सवाल उठवले रहस। ऊ खतौली से भाजपा विधायक विक्रम सिंह सैनी के मुजफ्फरनगर एमपी-एमएलए कोर्ट द्वारा दु बरिस के सजा सुनावल गइला के हवाला देत उनकरो सदस्यता समाप्त करे के मांग कइलें रहलें।
नियमन के मोताबिक विधायक भा सांसद के दु बरिस भा ओकरा de बेसी के सजा होखला प स्वत: सदन के सदस्यता समाप्त होखे के प्रावधान बा। एह आधार प सैनी के सदस्यता सजा वाला दिन से समाप्त मानल गइल रहे। हालांकि विधानसभा सचिवालय ने एह प न्याय विभाग से राय मंगले रहे। एकरा बाद एह सीट के रिक्त घोषित करे के निर्णय कइल गइल।
खतौली विधानसभा सीट रिक्त घोषित होखला के बाद अब क्षेत्र में राजनीतिक सरगर्मी बढ़ गइल बा। उपचुनाव के लेके सत्तारूढ़ दल में हलचल तेज हो गइल बा। 27 अगस्त 2013 के मुजफ्फरनगर जनपद के कवाल गांव में गौरव आ सचिन के हत्या के बाद पुलिस खतौली विधानसभा सीट से भाजपा विधायक विक्रम सैनी सहित 28 लोगन प आईपीसी के धारा 147, 148, 149, 307, 336, 353, 504 आ 506 में मुकदमा दर्ज कइल गइल रहे।
एकरा बाद बीतल दिनन एमपी-एमएलए कोर्ट विधायक विक्रम सैनी सहित 12 लोगन के दोषी करार देत दु-दु साल के सजा आ 10-10 हजार रुपिया के आर्थिक दंड लगवले रहे।
