उत्तर प्रदेश के पावन नगरी प्रयागराज में आजुकाल्हु बहुते सक्रियता बा. इहाँ महाकुंभ 2025 के तैयारी जोर शोर से चल रहल बा। एह महाकुंभ के शुरुआत में मात्र 3 दिन बाचल बा आ 13 जनवरी से शुरू होखे वाला बा। बॉलीवुड के सुपरस्टार गायक भी एह महाकुंभ के चहल-पहल में आपन आवाज जोड़े जा रहल बाड़े। शंकर महादेवन से लेके कैलाश खेर अवुरी मोहित चौहान तक बॉलीवुड के गायक अपना आवाज से लोग के मंत्रमुग्ध करे के कोशिश करीहे। सांस्कृतिक मंत्रालय काल्हु गायकन के पूरा सूची जारी कs दिहले बिया. एह सूची में मोहित चौहान, शंकर महादेवन आ कैलाश खेर जइसन दिग्गज गायकन के शामिल होखे जा रहल बा.
महोत्सव के शुरुआत पहिला दिन शंकर महादेवन के प्रस्तुति से होखी. आखिरी दिने मोहित चौहान अपना आत्मानुभूति वाला संगीत से कार्यक्रम के समापन करीहें. पूरा महा कुंभ में कैलाश खेर, शान मुखर्जी, हरिहरन, कविता कृष्णमूर्ति, कविता सेठ, ऋषभ रिखीराम शर्मा, शोवना नारायण, डॉ. एल सुब्रमण्यम, बिक्रम घोष, मालिनी अवस्थी समेत कई गो प्रशंसित गायक अपना आवाज के जादू फइलावे के काम करीहें. संस्कृति मंत्रालय एगो प्रेस विज्ञप्ति जारी कs के कहले बा कि एह आयोजनन के मकसद भक्तन खातिर मंत्रमुग्ध करे वाला आध्यात्मिक माहौल बनावल बा. एही बीच उत्तर प्रदेश के मुख्यमंत्री योगी आदित्यनाथ महाकुंभ के तैयारी के समीक्षा करे खातिर प्रयागराज के दौरा कईले। विभिन्न अखाड़न के दर्शन करके साधू लोग से मुलाकात कइले। एह दौरान सीएम संगम घाट इलाका में ‘निषादराज’ क्रूज पs भी सवारी कइलन आ तइयारी के जायजा लिहलन. दौरा के दौरान अधिकारी भी उनुका संगे रहले।
कड़ा सुरक्षा के बीच महाकुंभ के आयोजन
एकरा से पहिले सुरक्षा व्यवस्था के बात करत उत्तर प्रदेश के उपमुख्यमंत्री ब्रजेश पाठक कहले कि प्रशासन 125 एम्बुलेंस के तैनात कईले बा, जवन कि 15 एडवांस लाइफ सपोर्ट (एएसएल) सिस्टम से लैस बा। इs एम्बुलेंस आपातकालीन स्थिति में बेसिक लाइफ सपोर्ट देवेले। पाठक कहले कि, ‘एक सौ पच्चीस रोड एम्बुलेंस में 15 एडवांस लाइफ सपोर्ट (एएलएस) लगावल गईल बा। एकरा अलावे एयर एम्बुलेंस अवुरी सात नदी एम्बुलेंस के भी तैनाती कईल गईल बा। नदी के सात गो एम्बुलेंस में से एगो के आज तैनात देखाई दिही अवुरी बाकी के काल्ह से तैनात कs दिहल जाई। सरकार कवनो तरह के स्थिति से निपटे के उचित व्यवस्था कईले बिया। पुलिस महानिरीक्षक प्रयागराज तरुण गाबा बुध के बतवले कि सामूहिक धार्मिक आयोजन में कवनो प्रकार के अप्रिय घटना के रोके खातीर 7 स्तर के सुरक्षा योजना लागू कईल जाता।
इहो पढ़ीं :10 जनवरी 2025 के राशिफल
