Tokyo Olympic: ओलंपिक पदक विजेता हॉकी खिलाड़ी ललित बनिहें डिप्टी एसपी, 24 खिलाड़ियन के मिली नौकरी

अपर मुख्य सचिव खेल नवनीत सहगल बतवले कि 20 सितंबर के एगो बैठक होखे वाला बा। एकरा बाद सभे के नियुक्ति पत्र जारी कइल जाई। एतने ना कुल 24 खिलाड़ियन के राजपत्रित अधिकारी के पद प नौकरी देवे खातिर पदन के चिन्हित क लिहल गइल बा।

By Anurag Ranjan On Sep 16, 2022

उत्तर प्रदेश के मुख्यमंत्री योगी आदित्यनाथ खिलाड़ियन के उपहार देले बाड़ें। ऊ राज्य के नाम रोशन करे वाला कुल 24 खिलाड़ियन के राजपत्रित अधिकारी के पद प नौकरी देवे के निरदेस दिहल गइल बा। संगही टीम इंडिया के स्टार हॉकी खिलाड़ी ललित कुमार उपाध्याय के सीएम के निरदेस प पुलिस उपाधीक्षक (डिप्टी एसपी) प भर्ती कइल जाई।

खेल विभाग के एह प्रस्ताव प ललित सहमतियो जता देले बाड़ें। जल्दिये उनका के भर्ती कइल जाई। हॉकी में भारत 41 साल के लमहर इंतजार के बाद ओलंपिक में कवनो पदक जीतले रहे। भारतीय टीम टोक्यो ओलंपिक में कांस्य पदक हासिल कइले रहे। ओहिजा, बर्मिंघम राष्ट्रमंडल खेलन में जूडो में कांस्य पदक जीते वाला विजय यादव के राजस्व विभाग में नायब तहसीलदार के रूप में भर्ती कइल जाइ। विजय के एह प्रस्ताव प सहमति जतवले बाड़ें।

अपर मुख्य सचिव खेल नवनीत सहगल बतवले कि 20 सितंबर के एगो बैठक होखे वाला बा। एकरा बाद सभे के नियुक्ति पत्र जारी कइल जाई। एतने ना कुल 24 खिलाड़ियन के राजपत्रित अधिकारी के पद प नौकरी देवे खातिर पदन के चिन्हित क लिहल गइल बा। नव विभागन में भर्ती कइल जाई। एकरा खातिर प्रस्तावो तइयार कर लिहल गइल बा।

एक महीना में कोच के सब खाली पद भरल जाई

उत्तर प्रदेश में अब खिलाड़ियन के ट्रेनिंग देवे खातिर कोच के भर्ती होई। अभी कोच के कुल 450 पदन में से 270 पद खाली बा। खाली 180 कोच खिलाड़ियन के ट्रेनिंग दे रहल बा लो। अइसन में खेल प्रतियोगितन में प्रदेश के खिलाड़ियन के बेहतर प्रदर्शन खातिर कोच के सब खाली पद भरल जाई।