आज शनिचर के दिने डी.ए.वी.पी.जी.कॉलेज, गोरखपुर में राष्ट्रीय सेवा योजना के तत्वावधान में “विश्व जल दिवस” के सुअवसर पs विचार संगोष्ठी के आयोजन कइल गइल। एह अवसर पs प्राचार्य प्रो शैल पांडे आ कार्यक्रम अधिकारी श्रीमती प्रतिभा गुप्ता के नेतृत्व में वाद-विवाद के माध्यम से सभ स्वयंसेवकन आ स्वयं सेविका लो के जल के महत्व आ सदुपयोग के विषय में जागरूक कइल गइल।
जल एगो अनमोल संपदा हs – प्रो शैल पांडे
प्राचार्य प्रो. शैल पांडे सभ स्वयंसेवक आ स्वयंसेविका लोग के एह अवसर पs बतवली कि” जल एगो अनमोल संपदा हs। एकरा के व्यर्थ ना जाए दी। हमनी के सब केहू पानी के बिना जीवन के कल्पना नईखी कs सकत, बाकिर वर्तमान समय में भौतिक सुविधा हमनी के सभे के बहुत समस्या के ओर ले गईल बा अवुरी ओमे पानी के समस्या सबसे प्रमुख बा। अइसना में ऊ दिन दूर नइखे जब हमनी के पानी के एक-एक बूंद खातिर तरसे के मजबूर होखब जा. अगर हमनी के समय रहते पानी के बर्बादी के रोक ना पवनी जा तs हमनी के अपना अगिला पीढ़ी के समस्या के गहिराह गड्ढा में फेंक देब जा।”
कार्यक्रम अधिकारी श्रीमती प्रतिभा गुप्ता सभका से अपील कइली कि एह कार्यक्रम के उद्देश्य पूरा करीं आ कम से कम एगो प्रण लेव कि ऊ लोग अपना व्यवहारिक जीवन में पानी के प्रबंधन आ विवेकपूर्ण उपयोग के माध्यम से अपना घर, परिवार आ मोहल्ला में पानी के संरक्षण करी। एकरा खातिर सब शपथ लिहल कि-
“हम पानी के एगो अनमोल संसाधन मानब आ एकर इस्तेमाल ओइसहीं करब. हम पानी के विवेक से इस्तेमाल करब आ पानी के हर बूंद के संरक्षण करब।”हम “कैच द रेन” अभियान के बढ़ावा देवे में पूरा सहयोग देब।हम अपना परिवार के सदस्य, दोस्त अवुरी पड़ोसी के भी प्रेरित करब कि पानी के विवेक से इस्तेमाल करे अवुरी ओकरा के बर्बाद मत करे। हम समझत बानी कि हमरा समाज में पानी सबसे कीमती आ प्राकृतिक संसाधन हs। हमार मानना बा कि आज हमनी के पानी के प्रबंधन के तरीका से हमनी के भविष्य के लगभग हर पहलू पs असर पड़ी।पानी के संरक्षण के हर संभव प्रयास करब।
एह मौका पs नीतू,अमन,नाजिया,वैष्णवी आ प्रिया समेत सगरी स्वयंसेवक आ स्वयंसेविका लोग मौजूद रहले.
इहो पढ़ीं: भक्तिमय सोमार: ‘श्रद्धा के सागर’ धरती चीर के बाहर निकलल रहे गोरखपुर के मां काली के प्रतिमा
