ओडिशा के पुरी जगन्नाथ मंदिर में सोमार के साँझ के भगदड़ जइसन हालत बन गइल। एह घटना में 6 छात्रा लोग घाही हो गइली। अधिकारियन के कहनाम बा कि सब घायलन के अस्पताल में भर्ती करावल गइल बा, उनकर हालत स्थिर बा।
एगो पुलिस अधिकारी बतवलें, मयूरभंज जिला के रासगोविंदपुर के हृदानंदा हाई स्कूल के करीब 70 छात्र-छात्रा लोग सोमार के क्रिसमस के छुट्टियन में पिकनिक मनावे पुरी आइल रहनें लोग।
दिन भर छात्र लोग समुद्र तट पर रहलें अउर साँझ के ऊ मंदिर में दर्शन करे गइलें। रात करीब आठ बजे मंदिर के 22 सीढ़ी चढ़ले के दौरान अचानक से भगदड़ जइसन स्थिति उत्पन्न हो गइल, जेकर चपेट में लड़की आ गइलीं लोग अउर बेहोश हो के उहवें गिर गइली। जेकरे बाद सुरक्षाकर्मी लोग उनके बचा के अस्पताल में भर्ती करावल।
