भारत के खिलाफ अतवार के होखे वाला मुकाबला से पहिले पाकिस्तान के बड़ झटका लागल बा। टीम के तेज गेंदबाज शाहनवाज दहानी चोट के कारण सुपर-4 में टीम इंडिया के खिलाफ होखे वाला मुकाबला से बाहर हो गइले। पाकिस्तान के तेज गेंदबाज शाहनवाज दहानी चोटिल होखला के बाद एशिया कप 2022 के सुपर 4 राउंड में भारत बनाम पाकिस्तान के बीच होखे वाला भिड़ंत खातिर उपलब्ध ना होइहे। तेज गेंदबाज साइड स्ट्रेन के वजह से एह मुकाबला में ना खेलिहें आ अगिला 2-3 दिनन तक मेडिकल टीम द्वारा ओकर निगरानी कइल जाई।
भारत के खिलाफ एशिया कप 2022 के सुपर-4 मैच से पहिले पाकिस्तान के तेज गेंदबाज शाहनवाज दहानी के चोटिल होखल पाकिस्तान खातिर अच्छा खबर नइखे। दहानी 2 सितंबर के शारजाह क्रिकेट स्टेडियम में हॉन्ग कॉन्ग के खिलाफ खेले उतरे रहल, जहां उनका ई चोट ना लागल।
पीसीबी बयान में कहलस, ”शहनवाज दहानी अतवार के एशिया कप सुपर-4 मैच खातिर भारत के खिलाफ संदिग्ध साइड स्ट्रेन के कारण उपलब्ध ना होइहे। सुक के शारजाह में हॉन्ग कॉन्ग के खिलाफ मैच में गेंदबाजी करत घरी ऊ चोटिल भइले।”
कहल गइल, “जइसन कि साइड स्ट्रेन के कवनो चोट के ममिला में होला, मेडिकल टीम अगिला 48-72 घंटन तक उनकर निगरानी करी, जेकरा बाद ऊ स्कैन करी आ टूर्नामेंट में आगे के भागीदारी सहित निर्णय लिही।”
पाकिस्तान पहिलही से कइयन खिलाड़ियन के चोटिल होखला से परेसानी में बा। एकरा पहिले शाहीन शाह अफरीदी आ मोहम्मद वसीम जूनियर चोट के कारण टूर्नामेंट से बाहर हो गइल रहे लो। ई दुनो खिलाड़ी टूर्नामेंट शुरू होखे से पहिलही चोटिल हो गइल रहे लो।
