PAK vs SL Asia Cup Final: एशिया कप फाइनल आज, श्रीलंका के छठवा आ पाकिस्तान के तीसरा बेर चैंपियन बने पs नजर

दुष्मंथा चमीरा जैसे अनुभवी गेंदबाज के अनुपस्थिति के बावजूद श्रीलंका के आक्रमण मजबूत नजर आवत बा जबकि बल्लेबाजी में ओकरा लगे कुसल मेंडिस आ पाथुम निसांका के रूप में दु गो शानदार सलामी बल्लेबाज बा लो, जे निम्मन सुरूआत दिलावे में सक्षम बा लो।  दनुष्का गुणतिलका, भानुका राजपक्षे, शनाका आ करुणारत्ने उपयोग जोगदान देले बा लो। एशिया कप के पांच मैचन में अब तक श्रीलंकाई बल्लेबाज लो 28 छक्का आ 62 चौका लगवले बा लो, जवना से ओह लो के आक्रामक रवैया के पता चलत बा। गेंदबाजी में महेश तीक्ष्णा आ वानिंदु हसरंगा स्पिन विभाग के बखूबी संभरले बा लो, जबकि दिलशान मधुशंका मुख्य तेज गेंदबाज के जिम्मेदारी बहुते सराहनीय रूप से निभवले बाड़े।

एकरा उल्टा पाकिस्तान अपना कप्तान आ सर्वश्रेष्ठ बल्लेबाज बाबर के फॉर्म के लेके चिंतित बा जे अब तक पांच मैचन में खाली 63 रन बनवले बाड़े। ऊ फाइनल में निश्चित तौर पs बड़ पारी खेले के कोसिस करिहें। गेंदबाजी अभियो पाकिस्तान के मजबूत पक्ष नजर आवत बा। नसीम शाह के खेल में लगातार सुधार हो रहल बा जबकि हैरिस रऊफ आ मोहम्मद हसनैनो अच्छा प्रदर्शन कs रहल बा लो। ओकर दुनो स्पिनर लेग ब्रेक गेंदबाज शादाब खान आ बाया हाथ के स्पिनर मोहम्मद नवाज प्रभावशाली प्रदर्शन कइले बा लो।

श्रीलंका: पथुम निसांका, कुसल मेंडिस (विकेटकीपर), चरिथ असालंका/ धनंजया डी सिल्वा, दनुष्का गुणतिलका, भानुका राजपक्षे, दासुन शनाका (कप्तान), वानिंदु हसरंगा, चमिका करुणारत्ने, महेश तीक्षणा, प्रमोद मदुशन/ असिथा फर्नांडो, दिलशान मदुशंका।

पाकिस्तान: मोहम्मद रिजवान (विकेटकीपर), बाबर आजम (कप्तान), फखर जमान, इफ्तिखार अहमद, शादाब खान, मोहम्मद नवाज, आसिफ अली, खुशदिल शाह, हारिस रऊफ, नसीम शाह, मोहम्मद हसनैन।