Champions Trophy: भारत के फाइनल में पहुंचला पs पाकिस्तान में ना होई खिताबी मुकाबला, रिपोर्ट में बड़ खुलासा
Champions Trophy: अगिला साल होखे वाला चैंपियंस ट्रॉफी टूर्नामेंट खातिर अभी ले वेन्यू तय नइखे भइल। पाकिस्तान क्रिकेट बोर्ड एकर आधिकारिक मेजबान बा, बाकिर बीसीसीआई के ओर से टीम इंडिया के पाकिस्तान ना भेजे के फैसला पीसीबी के परेसानी में डाल देले बा। हालांकि, बीसीसीआई आधिकारिक तौर पs कवनो बयान तs नइखे देले, बाकिर ई जरूर कहले बा कि भारत सरकार जवन फैसला करी, उहे मानल जाई। दूसरका ओर पाकिस्तान चैंपियंस ट्रॉफी खातिर अपना स्टेडियम के मरम्मत में जुटल बा। आईसीसी के पीसीबी जवन ड्राफ्ट शेड्यूल भेजले बा, ओमे भारत के सब मैचन के मेजबानी लाहौर के दिहल गइल बा। अब एगो नया खुलासा भइल बा कि टीम इंडिया जदि फाइनल में पहुंचत बिया तs खिताबी मुकाबला पाकिस्तान में ना खेलल जाई। एसे पाकिस्तान के एगो आउर झटका लाग सकत बा।
भारत आ पाकिस्तान राजनीतिक तनाव के कारण एक दशक से जादे समय से द्विपक्षीय सीरीज नइखे खेलले आ दुनो टीम खाली आईसीसी भा एसीसी टूर्नामेंट्स के दौरान आमने-सामने होला। पाकिस्तान 2023 वनडे विश्व कप खातिर भारत के दौरा कइले रहे, बाकिर भारत चैंपियंस ट्रॉफी के लेले अभी तक आपन योजना नइखे बतवलें। टूर्नामेंट के फाइनल के स्थल के रूप में लाहौर के पुष्टि कइल गइल बा। टेलीग्राफ के एगो रिपोर्ट में दावा कइल गइल बा कि जदि भारतीय क्रिकेट टीम चैंपियंस ट्रॉफी 2025 के फाइनल खातिर क्वालिफाई करत बिया तs फाइनल दुबई में स्थानांतरित कइल जा सकत बा।
रिपोर्ट में आगे दावा कइल गइल बा कि भारत जदि पाकिस्तान के जतरा ना करे के फैसला करत बा तs ऊ आपन सब मैच संयुक्त अरब अमीरात (यूएई) में खेल सकत बा। हालांकि, पिछला कुछ हफ्तन में पाकिस्तान क्रिकेट बोर्ड (पीसीबी) विश्वास देखवले बा कि टूर्नामेंट पूरा तरे से पाकिस्तान में होई। एकरा पहिले पीसीबी अध्यक्ष मोहसिन नकवी विश्वास जतवले रहस कि 2025 आईसीसी चैंपियंस ट्रॉफी पाकिस्तान में सफलतापूर्वक आयोजित कइल जाई, जेमे भारत समेत सब भाग लेवे वाली टीम पाकिस्तान अइहें सs।
चैंपियंस ट्रॉफी टूर्नामेंट 19 फरवरी से नौ मार्च तक लाहौर, कराची आ रावलपिंडी में खेलल जा सकत बा। नकवी कहलें कि एह आयोजन के तइयारी निर्धारित समय पs चल रहल बा, स्टेडियमन में आउर सुधार पहिलही से जारी बा। लाहौर में नकवी भारत के भागीदारी के लेके जारी अनिश्चितता के लेके बयानो देलें। दुनो देसन के बीच राजनीतिक तनाव के कारण भारत जुलाई 2008 से पाकिस्तान के दौरा नइखे कइले बा। हालांकि, नकवी टूर्नामेंट में भारत के सामिल होखे के लेके आशान्वित बा।
ऊ कहलें, ‘भारतीय टीम के आवे के चाहीं। हम ओह ओह लोगन के इहां आवे के रद्द भा स्थगित करत नइखी देखत आ हमनी के विश्वास बा कि हमनी पाकिस्तान में चैंपियंस ट्रॉफी में सब टीमन के मेजबानी करेम सs। ऊ आश्वस्त कइलस कि स्टेडियम समय पs तइयार हो जाई आ आगे के कवनो नवीनीकरण टूर्नामेंट से पहिले पूरा हो जाई। नकवी कहलें, ‘एक तरे से रउआ कह सकत बानी कि हमनी के लगे एगो नया स्टेडियम होखे जा रहल बा।’
Comments are closed.