मेट गाला 2024 : मेट गाला 2024 के आयोजन न्यूयॉर्क शहर में सोमार 6 मई के रात भइल। जहाँ दुनिया भर के तमाम सुंदरी लोग भाग लेले रहे। जबकि भारत के टॉप बॉलीवुड अभिनेत्री आलिया भट्ट अपना देश के प्रतिनिधित्व कइली. एकरा संगे मोना पटेल, नताशा पूनावाला, ईशा अंबानी भी देखल गईल। एही बीच ‘लापता लेडीज’ के नितांशी भी फोटोशॉप के माध्यम से मेट गाला 2024 के शोभा बढ़वली। अब सोशल मीडिया पs उनकर फोटो तेजी से वायरल हो रहल बा।
नितांशी फोटोशॉप के माध्यम से मेट गाला 2024 के कालीन के शोभा बढ़ावत बाड़ी
असल में अभिनेत्री नितांशी गोयल ‘लापता लेडीज’ में ‘फूल’ के किरदार निभवले रहली. अभिनेत्री ‘लापता लेडीज’ से बॉलीवुड में आपन पहचान बना चुकल बाड़ी. उनुका किरदार खातिर प्रशंसकन के बहुते प्यार मिलल बा. फोटोशॉप के माध्यम से आईल फोटो में नितांशी के लुक के बात करत अभिनेत्री साधारण साड़ी पहिन के अपना फैशन स्टाइल के जलवा बिखेरली। संगही, ‘लापता लेडीज’ के ‘फूल’ अवतार में उनुका के मैरून रंग के शाल पहिनले अवुरी माथे पs मैचिंग बिंदी पहिनले देखल गईल।
आमिर खान के प्रोडक्शन टीम फोटो शेयर कइले बा
बता दीं कि एक ओर बॉलीवुड के मशहूर अभिनेत्री आलिया भट्ट हाथ से कढ़ाई वाला साड़ी पहिन के आपन फैशन स्टाइल देखवली। आलिया के साड़ी के डिजाइन सब्यसाची मुखर्जी बनवले रहले। एकरा संगे सोमार के सांझ के आमिर खान प्रोडक्शन के आधिकारिक इंस्टाग्राम हैंडल पs ‘फूल’ यानी ‘लापता लेडीज’ के नितांशी के मेट गाला रेड कार्पेट लुक के शेयर कईल गईल बा। हालांकि अभिनेत्री के इs तस्वीर फोटोशॉप के माध्यम से बनावल गईल बा।
प्रशंसक कमेंट कs रहल बाड़े
अभिनेत्री के ई पोस्ट शेयर करत आमिर खान के प्रोडक्शन टीम प्रशंसकन के जानकारी दिहलस कि अभिनेत्री मेट गाला 2024 के हिस्सा बन गइल बाड़ी. अब एह अभिनेत्री के फोटो सोशल मीडिया पs वायरल हो रहल बा. फैंस एह फोटो पs खूब प्यार के बरसात कs रहल बाड़े। एs पोस्ट पs कमेंट करत एगो यूजर लिखले कि, ‘उनुका सदाबहार शादी के ड्रेस में फूल खिलल बा’। एकरा संगे एगो अवुरी यूजर लिखले कि, ‘एह मौसम के पसंदीदा फूल’।
