छपरा: जयप्रकाश विश्वविद्यालय (जेपीयू) परिसर में अल्पसंख्यक महिला छात्रावास के निर्माण कइल जाई। ई निर्णय जिला प्रशासन आ विश्वविद्यालय प्रबंधन के संयुक्त पहल पs लिहल गइल बा। सारण के जिलाधिकारी अमन समीर साप्ताहिक समन्वय बैठक में एह संबंध में निरदेस दिहल। ऊ विश्वविद्यालय प्रशासन से छात्रावास निर्माण खातिर जमीन उपलब्ध करावे के अनुरोध कइले बा।
बिहार सरकार के अल्पसंख्यक कल्याण योजना के तहत ई छात्रावास बनावल जाई। विश्वविद्यालय परिसर में छात्रावास बने से छात्रा के सुरक्षित माहौल में पढ़ाई करे के अवसर मिली। जिला प्रशासन विश्वविद्यालय के जमीन आवंटन खातिर पत्र भेज दिहल गइल बा। जमीन चिह्नित होखतही निर्माण कार्य सुरू कs दिहल जाई। प्रशासन के लक्ष्य बा कि एक साल के भीतर छात्रावास बनके तइयार हो जाई।
बैठक में कल्याण विभाग से जुड़ल आउर मुद्दन पs चरचा भइल। जननायक कर्पूरी ठाकुर छात्रावास में छात्रन खातिर उचित बेवस्था करे के निरदेस दिहल गइल। संगही, 500 से अधिक अनुसूचित जाति के आबादी वाली पंचायतन में सामुदायिक भवन बनावे के योजना पs काम होई।
