उदयपुर में दर्जी कन्हैयालाल के हत्या से महज एक हफ्ता पहिले महाराष्ट्र के अमरावती जिला में 54 साल के रसायनज्ञ उमेश प्रह्लाद्राव कोल्हे के हत्या 21 जून के भईल रहे। मामला के जांच करेवाली टीम के अब मानना बा कि भाजपा के नूपुर शर्मा के कथित तौर प समर्थन करेवाला सोशल मीडिया पोस्ट के बदला में कोल्हे के हत्या क दिहल गईल।
उमेश कोल्हे के बेटा संकट कोल्हे के शिकायत के बाद अमरावती के सिटी कोतवाली थाना में मामला दर्ज क लिहल गईल बा। 23 जून के मुदस्सर अहमद आ 25 बरीस के शाहरुख पठान नाम के दू जने के गिरफ्तार कर लिहल गइल. एह लोग के पूछताछ में चार गो अउरी लोग के एहमें शामिल होखे के पता चलल. एहमें से तीन गो अब्दुल तौफीक (24 साल), शोएब खान (22 साल) आ अतीब रशीद के 25 जून के गिरफ्तार कर लिहल गइल रहे. एक शमीम अहमद फिरोज अहमद अभी फरार बाड़े।
घटना 21 जून के रात 10 बजे से 10.30 बजे के बीच भईल जब उमेश आपन दोकान ‘अमित मेडिकल स्टोर’ बंद क के घरे जात रहले। संकेत अपना पत्नी वैष्णवी के संगे एगो अवुरी स्कूटर प सवार रहले।
संकेत अपना शिकायत में पुलिस के बतवले कि हम प्रभात चौक से जात रहनी त हमनी के स्कूटर वीमेन कॉलेज न्यू हाई स्कूल के गेट प पहुंच गईल। बाबूजी के स्कूटी के सामने अचानक मोटरसाइकिल प सवार दु आदमी आ गईले। उ लोग हमरा बाबूजी के बाइक के रोक देले त एक आदमी उनुका गर्दन के बायां ओर चाकू से वार कईलस। बाबूजी गिर के खून बहत रहे। हम आपन स्कूटर रोक के मदद खातिर चिल्लाए लगनी। एगो अवरू आदमी आईल अवरू इ तिकड़ी मोटरसाइकिल प सवार होके फरार हो गईले।’ आसपास के लोग के मदद से कोल्हे के पास के एक्सन अस्पताल पहुंचावल गईल, जहां इलाज के दौरान उनुकर मौत हो गईल।
