GDP Growth News : भारत के सकल घरेलू उत्पाद (GDP) के विकास दर दूसरका तिमाही में 8.2 प्रतिशत पहुंच गइल बा। सरकारी आंकड़ा के मोताबिक, पिछिला वित्त बरिस के एह तिमाही में ई दर 5.6 प्रतिशत रहे। जुलाई-सितंबर वाली तिमाही में 8.2 प्रतिशत के विकास दर छव तिमाही में सबसे ऊंचा स्तर मानल जा रहल बा। एह बढ़ोतरी के वजह बा-GST दर में कटौती से खपत बढ़े के उम्मेद, जवना कारण कारखाना में उत्पादन तेजी से बढ़ल।
“लोगन के मेहनत के नतीजा” -पीएम मोदी
GDP के मजबूती भरल आंकड़ा पs प्रधानमंत्री नरेंद्र मोदी खुसी जतवलें। पीएम मोदी कहलें कि 2025-26 के दूसरका तिमाही में 8.2% GDP ग्रोथ भारत के मेहनती लोग आ उद्यमशीलता के प्रतिबिंब बा। एक्स पs पीएम लिखलें, “ई विकास-समर्थक नीतियन, सुधारन के असर आ देस के लोगन के कड़ा मेहनत के नतीजा बा। सरकार सुधारन के गति आउर तेज करी आ आम जनता के जिनगी आसान बनावे में लागल रही।”
दूसरका तिमाही के 8.2% विकास दर पिछला तीन महीना के 7.8% आ एक साल पहिले के 5.6% से बहुते बेहतर बा। विनिर्माण क्षेत्र- जवना के हिस्सा GDP में करीब 14% बा- एह तिमाही में 9.1% बढ़ल, जबकि पिछला साल ई बढ़न्ती मात्र 2.2% रहल रहे।
“एह साल विकास दर 7% के पार जा सकेला” – CEA नागेश्वरन
GDP के दमदार आंकड़ा से उत्साहित भारत के मुख्य आर्थिक सलाहकार (CEA) वी. अनंत नागेश्वरन विश्वास जतवलें कि चालू वित्त बरिस में भारत के विकास दर 7% के आंकड़ा पार कर जाई। ऊ कहलें कि अप्रिल से सितंबर तक पहिला छमाही में GDP वृद्धि 8% रहल। अब पूरा साल 7% भा जादे ग्रोथ के उम्मीद मजबूत हो गइल बा।
ऊ इहो भी बतवलें कि मार्च 2025 तक भारत के GDP 3.9 ट्रिलियन डॉलर रहे। मौजूदा रफ्तार देखत कहीं, एह वित्त बरिस में भारत 4 ट्रिलियन डॉलर के ऐतिहासिक आंकड़ा छू सकत बा।
राजकोषीय घाटा 8.25 लाख करोड़ पहुंचल
अप्रिल से अक्टूबर के बीच भारत के राजकोषीय घाटा 8.25 लाख करोड़ रुपिया हो गइल। ई वार्षिक अनुमान के 52.6% बा। पिछला साल ई आंकड़ा 46.5% रहे। सरकार के लक्ष्य बा कि पूरा वित्त बरिस में राजकोषीय घाटा GDP के 4.4% तक सीमित रखल जाव, जवन एक साल पहिले 4.8% रहे।
1 दिसंबर के जारी होई औद्योगिक उत्पादन आंकड़ा
सरकार बतवलस कि अक्टूबर 2025 के औद्योगिक उत्पादन (IIP) के आंकड़ा 1 दिसंबर के जारी होई। आमतौर पs IIP रिपोर्ट हर महीना के 28 तारीख के जारी होला, बाकिर छुट्टी पड़ला पs अगिला कार्यदिवस पs एकरा के जारी कइल जाला।
Read Also:
