भारत मेलबर्न में जिम्बाब्वे के 71 रन से हरवलस
भारत ग्रुप-2 में आपन पांच में से चार मुकाबला जीतल आ आठ अंक के संगे शीर्ष प रहल। ओहिजा, एह ग्रुप से क्वालिफाई करे वाली दूसरका टीम पाकिस्तान रहल। ओकर छव अंक बा। अब पहिला सेमीफाइनल में न्यूजीलैंड के सामना बुध के पाकिस्तान से सिडनी में बा ओहिजा, टीम इंडिया दूसरका सेमीफाइनल में बियफे के इंग्लैंड से एडिलेड ओवल में भिड़ी।
टॉस जीतके पहिले बल्लेबाजी करत टीम इंडिया 20 ओवर में पांच विकेट गंवाके 186 रन बनवलस। केएल राहुल सुरुआत में आ सूर्यकुमार यादव आखिर में बेहतरीन पारी खेलल लो। दुनो खेलाडी अर्धशतक जमावल लो। राहुल 35 गेना में 51 रन बनवले। ओहिजा, सूर्यकुमार 25 गेना में 61 रन क नाबाद पारी खेलले। ऊ मैच के अंत में कइयन गो अविश्वसनीय शॉट्स लगवले। अपना पारी में सूर्यकुमार छव गो चौका आ चार गो छक्का लगवले। जवाब में जिम्बाब्वे के टीम 17.2 ओवर में 115 रन प सिमट गइल। रेयान बर्ल सबसे जादे 35 रन बनवले।
जिम्बाब्वे खातिर सिकंदर रजा 34 रन के पारी खेलले। भारत के ओर से रविचंद्रन अश्विन सबसे जादा तीन विकेट लेले। ओहिजा, मोहम्मद शमी आ हार्दिक पांड्या के दु-दु विकेट मिलल। भुवनेश्वर कुमार, अर्शदीप सिंह आ अक्षर पटेल के एक-एक विकेट मिलल। सूर्यकुमार के उनकर शानदार पारी खातिर प्लेयर ऑफ द मैच अवॉर्ड दिहल गइल।
