IND vs AUS: मेलबर्न में भारत आ ऑस्ट्रेलिया के बीच पांच मैचन के टेस्ट सीरीज के चउथा मुकाबला खेलल जा रहल बा। एक-एक के बराबरी पs खड़ा श्रृंखला के एह मुकाबला में ऑस्ट्रेलिया टॉस जीतके पहिले बल्लेबाजी करे के फैसला लेलस। पहिला दिन स्टंप्स होखे तक ऑस्ट्रेलिया छव विकेट खोके 311 रन बनवलस। एह मुकाबला के दौरान टीम इंडिया के स्टार खिलाड़ी विराट कोहली ऑस्ट्रेलिया के नवहा बल्लेबाज सैम कोंस्टास से भिड़त नजर अइलें। विराट कोहली के अब अइसन कइल भारी पड़ गइल बा। क्रिकबज के रिपोर्ट के अनुसार, आईसीसी उनका मैच फीस के 20% जुर्माना लगवले बा। ओहिजा, उनका के एक डिमेरिट अंक दिहल गइल बा। पिछलला 24 महीनन में ई कोहली के पहिला डिमेरिट अंक बा। अइसन में उनका के कुछ खास नुकसान ना होई।
ई बा पूरा ममिला
ऑस्ट्रेलियाई पारी के 10 ओवरन के खेल खत्म होखला के बाद जब प्लेयर्स दूसरका छोर के तरफ जा रहल बा तs ओहि समय कोहली जेकरा हाथ में गेना रहे ऊ पिच की तरफ से निकलत रहस। एही दौरान दूसरका ओर से आ रहल सैम कोंस्टास के कंधा कोहली के कंधा से जाके भिड़ गइल। हालांकि, कंधा लगला के बाद कोहली आगे के तरफ बढ़ गइल रहस। बाकिर, एही दौरान सैम उनका से कुछ कहलें तs कोहली फेर पलटके ऊ जवाब देलें, जेमे दुनों के बीच बहुते गहमागहमी देखे के मिलल आ अइसन में अंपायर के बीच बचाव खातिर आगे आवे के पड़ल। सैम अपना बल्लेबाजी के दौरान काफी आक्रामक दिखाई देलें, जेमे ऊ लगातार एमसीजी में मौजूद फैंस के इशारा करत रहस।
कोंस्टास खेलले सानदार पारी
ऑस्ट्रेलिया खातिर इंटरनेशनल डेब्यू कs रहल सैम कोंस्टास भारत के खिलाफ एह मुकाबला में कमाल के फॉर्म में नजर आइल। ऊ अपना डेब्यू मैच में 60 रनन के पारी खेलले। पूरा सीरीज के दौरान ऑस्ट्रेलियाई टॉप ऑर्डर बहुते निराश कइले रहे, बाकिर कोंस्टास एह मैच में ई तय कइलें कि ऊ अपना टीम के एगो अच्छा आ तेज सुरुआत दियावस। जवना कारण ऊ एह मुकाबला में सानदार पारी खेलले आ पहिला विकेट खातिर उस्मान ख्वाजा के संगे मिलके 89 रन जोड़लें।
Read Also: जनरथ बस के घटल किराया अब दिल्ली ले 321 रुपिया में करीं एसी बस के सफर