भारत आ ऑस्ट्रेलिया के बीचे टेस्ट सीरीज के तीसरका मैच से पहिले भारतीय कप्तान रोहित शर्मा सलामी बल्लेबाज लोकेश राहुल के समर्थन कइले बाड़े। उ कहले कि राहुल के उपकप्तान के पद से हटा दिहल गइल कवनो संकेत नइखे देतs, जवन खिलाड़ी के भीतरी प्रतिभा बा उनका के मवका मिलत रही। वहीं, टेस्ट सीरीज के तीसरका मुकाबला में भारतीय टीम के लेके उ कहले कि टॉस के बेरा ऊ प्लेइंग 11 तय कइल पसन करेले, काहें कि खिलाड़ियन के चोटिल होखे के डर रहेला ।
रोहित आ गिल मंगर के अभ्यास सत्र के दउरान नेट्स पs एके संगे बल्लेबाजी कईले, जबकि राहुल टीम के अधिकांश सदस्य लोगन के संगे होटल में रहे के फईसला कइले। ई अभ्यास सत्र वैकल्पिक रहे। ओहिजे, गिल आ राहुल दूनो लोग सोमार को ट्रेनिंग सत्र के दउरान एक संगे बल्लेबाजी कइले रहले लो।
हाले में भारतीय क्रिकेट टीम से उपकप्तान के पद से के एल राहुल हटा दिहल गईल रहे ओकरा बादे से मीडिया आ सोशल मीडिया पs राहुल के तिसरका टेस्ट मैच जवन 1 मार्च से इंदौर में खेलल जाई पs सवाल खड़ा हो गईल रहे आ ओकरा पs चरचा शुरू हो गईल रहे।