गोरखपुर के रामगढ़ताल के तर्ज पs शहर के उत्तरी किनारा पs स्थित चिलुआताल के विकास खातीर न्यूनतम कंक्रीट के इस्तेमाल कईल जाई। घाट के आसपास ताड़ के पेड़ ना लगावल जाई। लेक मैन ऑफ इंडिया के नाम से जानल जाए वाला आनंद मल्ली गावड़ के निरीक्षण के बाद पर्यटन विभाग उनुका निर्देश के पालन करत विकल्प के तलाश शुरू क देले बा।
चिलुआताल के सौंदर्यीकरण के बाद गोरखपुर पर्यटन के एगो नया स्थल बन जाई। अब ले जे इहाँ आवे से परहेज करेला, लेकिन आवे वाला समय में ए जगह के सुंदरता देखे आई।
पर्यटन विभाग चिलुआताल में 560 मीटर कंक्रीट के घाट, पटरी, गजेबिया, बेंच अवुरी शौचालय खातीर करीब 20 करोड़ रुपया के प्रस्ताव सरकार के भेजले रहे। प्रस्ताव के स्वीकार करत सरकार बजट जारी क देले बिया। एकरा बाद एकर काम तेजी से चल रहल बा।
क्षेत्रीय पर्यटन अधिकारी रविन्द्र कुमार मिश्रा बतवले कि लेक मैन ऑफ इंडिया के निरीक्षण के दौरान घाट के प्राकृतिक सुंदरता के कायम राखे खातीर बहुत निर्देश दिहल गईल। उनुकर निर्देश पूरा तरीका से लागू हो जाई। एकर कवायद शुरू हो गइल बा.
