सहजनवां/जगदीशपुर। सहजनवां आ एम्स थाना क्षेत्र में प्रेमिका से मिले गइल जुवकन के ग्रामीण लोग पकड़ लिहल। पुलिस तक ममिला पहुंचला के बाद पंचायत भइल। एकरा बाद परिजन लोग दुनो जोड़ा के बियाह करा दिहल।
कैंट थाना क्षेत्र के मोहद्दीपुर निवासी जुवक आ सहजनवां क्षेत्र के एगो गांव के रहे वाली जुवती आर्केस्ट्रा में काम करत रहे लो।
साथ में काम करत दुनो के जान पहचान हो गइल आ प्रेम हो गइल। तीन बरिस से दुनो एक दूसरा से मिलत रहे लो। सनीचर के रात घर से चलके जुवक प्रेमिका से मिले खातिर उनका घरे पहुंच गइल। दुनो एक सागे बइठले रहे लो आ एकर भनक जुवती के घर वालन के लाग गइल। एकरा बाद मवका पs पहुंचल परिजन लोग पकड़ के जुवक के पिटाई कs दिहल।
एही बीच कवनो ग्रामीण थाना पs सूचना दे देलस। मवका पs पहुंचल पुलिस जुवक के लेके थाना चल गइल। पूछताछ के बाद जुवती आ जुवक के परिजनन के थाना पs बुलावल गइल। थानाध्यक्ष महेश चौबे बतवलें कि जुवक आ जुवती के परिजन दुनो के बियाह करावे खातिर तइयार हो गइल रहे लो।
जुवक के रातभर थाना में रखे के कारण शांतिभंग में ओकर चालान कs दिहल गइल। जमानत मिलला के बाद परिजनन के मवजूदगी में दुनो लोग मंदिर में बियाह कइल।
ओहिजा, एम्स थाना क्षेत्र के एगो गांव के जुवक के क्षेत्र के एगाे सजातीय जुवती से प्रेम संबंध रहे। सनिचर के रात जुवक अपना प्रेमिका से मिले पहुंचल रहे तबे लईकी के परिजन देख लिहल लोग आ लईका के पकड़ लिहल।
बाद में जुवक कवनो तरे घर आइल। सबेरे जुवती के मां एम्स थाना में तहरीर देके कार्रवाई के मांग कइली। एह पs गांव के कुछ लोग दुनो पक्ष के बईठाके बातचीत कइलें। निर्णय लिहल गइल कि दुनो सजातीय के संगे-संगे बालिगो बा लो तs बियाह करा दिहल जाव। एकरा बाद अतवार के सांझ क्षेत्र के एगो मंदिर में दुनो पक्ष आ गांव के लोगन के मवजूदगी में एह लोगन के बियाह करा दिहल गइल।
