गोरखपुर के टाउन हॉल बैंक रोड पs मंगर के रात आग लग गइल। ई आग कुर्सी बाजार में लागल। बतावल जा रहल बा कि दु गो धमाकन के संगे भयंकर आग लागल। ई आग एतना बड़ रहे कि अगल-बगल के घरन के खाली करावे के पड़ल। बता दीं कि बैंक रोड गोरखपुर शहर के सबसे खास चौराहा हs। मवका पs दर्जनन दमकल के गाड़ियन के आग काबू करे खातिर लगावाल गइल।
स्थानीय लोग बतावल कि आग तनिये देर में विकराल रूप ले लेलस। एह दौरान अफरा तफरी के माहौल हो गइल। आग अगल-बगल के घरन तक पहुंच गइल। अइसन में लोगन के सुरक्षा के मद्देनजर पुलिस घरन के खाली करवलस। घटनास्थल के नजदीक इस्थित शिवाय होटल में ठहरल लोगन के बाहर निकालल गइल।
हालांकि, अभी ले एह हादसा में केहू के घायल होखला के खबर नइखे। एह हादसा के कारण एक रेस्टोरेंट में आग लगला के बाद उहां रखल सिलिंडर में तेज धमाका होखला के मानल जा रहल बा। एकरा बाद आग आसपास के दुकानन के अपना जद में ले लेलस। बगल में पेट्रोल पंप होखल से लोगन में आउर डर फइल गइल। आग से लाखन के नुकसान भइल बा। तकरीबन 12 दुकान एह आग के चपेट में आ गइल।
