ओटीटी के दुनिया में बवाल मचावे खातिर आ गईल ”The Night Manager” । जॉन ल करे के दुनिया भर में चर्चित उपन्यास ‘द नाइट मैनेजर’ पs पहिला हाली वेबसीरिज आजू से सात साल पहिले बनल रहे । बीबीसी वन पs प्रसारण के संगही ई वेबसीरिज दुनिया भर में धूम मचा देले रहे। आ दर्जन भर पुरस्कार जीतलस।आ, फेरू शुरू भईल एकर दुनिया भर के अलगा-अलगा भाषा में एकर निर्माण के सिलसिला। तकरीबन तीन चौथाई दुनिया घूमि के ई सीरीज अब भारत पहुंचल बिया । डिज्नी+ हॉटस्टार के छवि एह देश में अंतर्राष्ट्रीय स्तर पs चर्चित कार्यक्रमन के हिंदी में बनावे वाला के रूप में स्थापित होखत जा रहल बा, वेब सीरीज ‘द नाइट मैनेजर’ एही बात के छटांक भर अउरी आगे बढ़ावत बिया। पसंगा के तौर पs एह में अनिल कपूर बाड़े, श्रीधर राघवन बाड़े आ हरमेसा विचलित करे वाला किरदार में शाश्वत चटर्जी। एह सीरीज के देखे खातिर बस ईहे तीन गो लोग प्रमुख कारण बनल बाड़े बाकिर सीरीज देखला के बाद जवन दु गो अउरी कलाकारन के सबसे ज्यादा तारीफ करे के रवा सब के मन करी उ तिलोत्तमा शोम आ शोभिता धूलिपाला बाड़ी।
ढाका से दिल्ली बाकिर वाया वाया
कहानी के सिरो हमनी के तिलोत्तमा शोम के किरदार से ही पकड़त बानी जा । उ रॉ (सीरीज में एकर पूरा नाम रिसर्च एंड एडमिनिस्ट्रेशन बतावल गईल बा) में बांग्लादेश डेस्क पs काम करे वाली एगो जुझारू खुफिया अफसर बाड़ी। उनका लगे से वाया वाया होत एगो जानकारी पहुंचत बा आ फेरू ई जानकारी वाया वाया होत ओहि शख्स के पास जा पहुंचेला जवना के बारे में अपना जान पs खेलि के एगो होटल के नाइट मैनेजर ई जानकारी पहुंचवले रहे। अब दुनो के जिनगी दांव पs लागल बिया। वेब सीरीज ‘द नाइट मैनेजर’ एगो अइसन होटल मैनेजर के कहानी बिया जवन नाइट शिफ्ट में काम करsता ओहि होटल में ही संजोग अइसन बनत बा कि ओकरा एगो नवहा युवती के मदद करे के परि जाला आ ई युवती जवना शख्स के पत्नी होले, ओकर संपर्क दुनिया भर में आपन कारोबार फइल के बईठल एगो अइसन आदमी होला जेकरा पीछे खुफिया विभाग बरिसन से लागल बा। नाइट मैनेजर के भी आपन एगो अतीत बा जवना से उ दूर भागल चाहत बा। बाकिर, खुफिया विभाग ओकरा के अइसन घुट्टी पियावेला कि उ तमाम कोशिसन के बादो उ फेरू से पूरा मकड़जाल से बहरी ना आ पवेला।
विदेशी कहानी के नीक बा अनुकूलन
वेब सीरीज ‘द नाइट मैनेजर’ के डीएनए अईसन बा कि जवना पs हर देश, संस्कृति आ सियासत के मुलम्मा चढ़ावल जा सकत बा । ई काम सीरीज के पटकथा लिखे वाला श्रीधर राघवन बड़ा कमाल तरीका से कईले बाड़े। बांग्लादेश से शुरू भईल ई कहानी देसा-देसी घूमत रहत बिया। एकर दूसरा सिरा दिल्ली में बन्हाईल बा। खाद के फैक्ट्री के बहाने हथियारन के तस्करी के एह कहानी के देसी बनावे में एकर संवाद लेखक अक्षय घिल्डियाल आ शांतनु श्रीवास्तव बहुते मेहनत कइले बाड़े आ ओ लोग के मेहनतो एह सीरीज में हर डायलॉग में देखे के मिलत बा। ऊपर से देखे मे ई सीरीज एक्शन थ्रिलर लागे ले बाकिर एकर अंतर्धारा ड्रामा आ सस्पेंस के हs। आ, गते-गते परत- दर-परत खुलत एकर कहानी के इहे खासियत एकरा के आखिर तक देख के चाव बना के राखत बा। दोसरका देशन में सीरीज के पूरा कहानी एक साथ देखावल गईल रहे। एहिजा हॉटस्टार के हुक्मरान लोग एह सीरीज के दु हिस्सन में बांट देले बा। ओरीजनल सीरीज के पहिला तीन एपिसोड के कहानी हिंदी में चार एपीसोड में देखवला के बाद सीरीज के समापन बा । बाकी के एपिसोड अब गर्मि के दिन में आई। एहसास अइसन मवका पs कुछ अइसन होत बा कि कवनो उपन्यास के कवर देख के रवा ओकरा के पढ़े सुरू करिं आ बीचवे में केहू आधवा किताब फार के अपना लगे धई लेबे ।
खबर भोजपुरी दे रहल बा एह सीरीज के 5 में से 3 गो
⭐⭐⭐/⭐⭐⭐⭐⭐
Movie Review
द नाईट मैनेजर
कलाकार: