स्पोर्ट्स डेस्क। भारत के स्टार भाला फेंक एथलीट नीरज चोपड़ा लगातार तीसरका साल डायमंड लीग फाइनल (Diamond League Final 2025) के खिताब अपना नावे करे में असफल रहलें। नीरज एह दौरान संघर्ष करत नजर अइलें, बाकिर 85.01 मीटर के अपना सर्वश्रेष्ठ थ्रो से दूसरका स्थान पs रहलें। नीरज 2022 में डायमंड लीग के ट्रॉफी अपना नावे कs चुकल बाड़ें, बाकिर 2023 आ 2024 के बाद अबकियो साल उ उपविजेता रहलें। जर्मनी के जूलियन वेबर 91.51 मीटर के सर्वश्रेष्ठ थ्रो के संगे खिताब अपना नावे करे में सफल रहलें।
वेबर के पीछे ना छोड़ सकलें नीरज
नीरज के प्रदर्शन एह सीजन अच्छा रहल रहे। नीरज डायमंड लीग के चार में से दुगो क्वालिफाइंग चरण में हिस्सा लेले रहस, एकरा बादो उ चउथा स्थान पs रहत फाइनल खातिर क्वालिफाई करे में सफल रहल रहस। नीरज एह दौरान 90 मीटर के आंकड़ा तक पार कs लेले रहस। जवन उनका खातिर पिछला कुछ समय से चुनौती बनल रहे। नीरज मई में दोहा चरण में 90.23 मीटर के थ्रो के संगे 90 मीटर के आंकड़ा के पार कइले रहस, बाकिर जर्मनी के वेबर के पीछे दूसरका स्थान पs रहल रहस। एकरा बाद उ जून में 88.16 मीटर के प्रयास के संगे पेरिस चरण जीतले रहस। डायमंड लीग के फाइनलो में अइसने देखे के मिलल, जहां नीरज वेबर के पीछे ना छोड़ सकलें।
पहिला प्रयास में तीसरका स्थान पs रहलें नीरज
वेबर पहिलके प्रयास में 91 मीटर से जादे के थ्रो कs के नीरज पs दबाव बना देले रहस। नीरज पहिला प्रयास में 84.35 मीटर भाला फेंकलें आ उ तीसरका स्थान पs रहलें। शीर्ष पs सुरुआते से जर्मनी के जूलियन वेबर रहलें, जे पहिलके प्रयास में 91.37 मीटर दूर भाला फेंकलें। दूसरका स्थान पs त्रिनिदाद एंड टोबैगो के केशोर्न वालकॉट रहस, जे 84.95 मीटर भाला फेंकलें।
लगातार दूसरका प्रयास में वेबर 91+ मीटर के थ्रो कइलें
नीरज जहां दूसरका प्रयास में 82 मीटर भाला फेंकलें आ उ तीसरका स्थान पs रहलें। ओहिजा, जूलियन वेबर लगातार दूसरका बेर 91 मीटर से जादे भाला फेंकलस आ शीर्ष पs बरकरार रहलें। उ 91.51 मीटर भाला फेंकलें। दूसरका प्रयास के बादोदूसरका स्थान पs केशोर्न वालकॉट थे, जे 79.91 मीटर के दूरी तय कइलें।
नीरज के लगातार तीन प्रयास फाउल रहल
नीरज लय में नजर ना आवत रहस आ उ तीसरका, चउथा आउर पांचवां प्रयास में फाउल कइलें, बाकिर एकरा से उनका स्थान पs कवनो फरक ना पड़ल आ उ तीसरको स्थान पs काबिज रहलें। हालांकि, दु बेर के ओलंपिक पदक विजेता नीरज छठा आ अंतिम प्रयास में गियर बदललें आ 85.01 मीटर के थ्रो कs के दूसरका स्थान पs पहुंचे में सफल रहलें। नीरज अपना एह थ्रो से वॉलकॉट के तीसरला स्थान पs ढकेल देलें। ओहिजा, पहिला पायदान पs जर्मनी के जूलियन वेबर दबदबा बनाके रखलें। तीसरको प्रयास में उ फाउल कइलें।
वेबर फेर चउथा प्रयास में 83.66 मीटर आ पांचवां प्रयास में 86.45 मीटर के भाला फेंकलें, जबकि छठा प्रयास में 88.66 मीटर के थ्रो कइलें। वेबर के दूसरका प्रयास खिताब जीते खातिर काफी रहे। वॉलकॉट तीसरका प्रयास में 81.78 मीटर के दूरी तय कइलें, जबकि चउथा प्रयास में फाउल कइलें आ पांचवां प्रयास में 77 मीटर के थ्रो फेंकलें। अंतिम प्रयास में उ 78.30 मीटर के थ्रो कइलें आ 84.95 मीटर के अपना सर्वश्रेष्ठ थ्रो से तीसरका स्थान पs रहलें।
