लखनऊ: परिषदीय विद्यालयन के लईकन खातिर अब गरमी के छुट्टियन में समर कैंप लगावल जाई। एमे लईकन के खेल-खेल में पढ़ाई के संगही अतिरिक्त गतिविधियन से जोड़ल जाई। मुख्यमंत्री योगी आदित्यनाथ के निरदेस पs बेसिक शिक्षा विभाग एकर तइयारी सुरू कs देले बाड़ें।
समर कैंप 20 मई से 15 जून के बीच चयनित विद्यालयन में आयोजित कइल जाई। समर कैंप के उद्देश्य लईकन के शारीरिक आ मानसिक रूप से स्वस्थ रखत सीखे खातिर प्रेरित करे के बा। विभाग एकरा पs लगभग 200 करोड़ खर्च करी। ई पहल ना खाली लईकन के शैक्षिक विकास के बढ़ावा दिही, बलुक उनकर छिपल प्रतिभा के निखारे में मददगार साबित होई।
अभी ले एह तरे के कवायद खाली निजी विद्यालयन में होला। विभाग के अनुसार कैंप में फाउंडेशनल लिट्रेसी आ न्यूमेरेसी (एफएलएन) पs आधारित गतिविधि होइहें सs। जीवन कौशल, व्यक्तित्व विकास, योग, खेलकूद, विज्ञान-तकनीक आधारित प्रयोग, कला-सांस्कृतिक कार्यक्रम आ पर्यावरण के प्रति उनका के जागरूक बनावल जाई। कैंप सबेरे डेढ़ घंटा तक आयोजित कइल जाई।
शिक्षामित्र, अनुदेशक आ शिक्षकन के देखरेख में कैंप के संचालन होई। कैंप में लईकन के सप्लीमेंट्री न्यूट्रीशन के तहत गुड़ के चिक्की, बाजरा के लड्डू, रामदाना लड्डू, गुड़-चना आ लैया पट्टी जइसन पौष्टिक खानपान के चीज दिहल जाई।
शिक्षकन-कर्मचारियन के ईद से पहिले करीं वेतन के भुगतान
उत्तर प्रदेश माध्यमिक शिक्षक संघ (चंदेल गुट) प्रदेश सरकार से मांग कइले बा कि शिक्षक-कर्मचारियन के ईद के पहिले वेतन भुगतान कइल जाई। संगही 31 मार्च के ईद के देखत बोर्ड परीक्षा मूल्यांकन कार्य बंद कइल जाव। संघ के प्रदेश मंत्री संजय द्विवेदी मुख्यमंत्री योगी आदित्यनाथ के भेजल पत्र में कहल गइल बा कि ईद 31 मार्च के बा।
सरकार के वित्तीय नियमावली के अनुसार महीना के आखिरी तारीख पs पड़े वाला छुट्टी आ परब के दृष्टिगत एडवांस में वेतन भुगतान कइल जा सकत बा। पहिलहू अइसन कइल गइल रहे। अइसन में ईद के धेयान में रखत सरकार कर्मचारियन के एडवांस में वेतन भुगतान करीं। द्विवेदी कहलें कि यूपी बोर्ड के कॉपियन के मूल्यांकन 19 मार्च से सुरू भइल बा, जवन दु अप्रिल तक चली। ईद के देखत 31 मार्च के प्रदेश के सब मूल्यांकन केंद्रन पs मूल्यांकन कार्य स्थगित करे के निरदेस जारी कइल जावs।
Read Also:
