भारतीय डाक्टर महज नौ दिन में ब्लड कैंसर खतम कs दिहले. संगही, पहिला बेर अस्पताल में ही सीएआर-टी सेल बना के मरीज के दिहल गईल। नई दिल्ली के इंडियन काउंसिल ऑफ मेडिकल रिसर्च (आईसीएमआर) कैंसर के इलाज में एगो बड़ सफलता के एलान कईले बिया, काहेंकी 80 प्रतिशत मरीज के 15 महीना बाद भी कवनो सक्रिय कैंसर नईखे।
आईसीएमआर के मुताबिक, एs परीक्षण से पता चलता कि कैंसर के इलाज के कईसे सस्ता, तेज अवुरी मरीज के करीब बनावल जा सकता। भारत अब देशी बायो-थेरेपी के विकास में अग्रणी बन रहल बा, जवन वैश्विक स्तर पs भी महत्वपूर्ण बा। ई सफलता आईसीएमआर आ सीएमसी वेल्लोर के एगो क्लिनिकल ट्रायल में मिलल बा जवना के नाव वेलकार्टी बा. एह परीक्षण के नतीजा मोलिक्यूलर थेरेपी ऑन्कोलॉजी जर्नल में प्रकाशित भईल बा।
जर्नल में प्रकाशित विवरण के मुताबिक, डॉक्टर एक्यूट एक्यूट लिम्फोब्लास्टिक ल्यूकेमिया (एएलएल) अवुरी लार्ज बी-सेल लिम्फोमा (एलबीसीएल) से पीड़ित मरीज पs सीएआर-टी थेरेपी के परीक्षण कईले। इs दुनो रक्त के कैंसर के प्रकार हs। एह प्रक्रिया में मरीज के खुद के टी-सेल (इम्यून सेल) के कैंसर से लड़े खातिर तैयार कईल जाला। हालांकि भारत में सीएआर-टी थेरेपी के इs पहिला अध्ययन नईखे। इम्यूनो एक्ट आ टाटा मेमोरियल अस्पताल मुंबई मिल के पहिला देशी चिकित्सा के विकास कइले बा जवना के 2023 में केंद्र से भी मंजूरी मिलल बा।
पहिला परीक्षण में अयीसन नतीजा मिलल
परीक्षण के नतीजा जारी करत आईसीएमआर कहलस कि एक्यूट लिम्फोब्लास्टिक ल्यूकेमिया (ALL) कैंसर से प्रभावित सभ मरीज ठीक हो गईले, जबकि लार्ज बी-सेल लिम्फोमा (LBCL) के 50% मरीज बेमारी से मुक्त बाड़े। दुनो प्रकार के मरीज के लंबा समय ले फॉलोअप कईल गईल, जवना में 80% मरीज 15 महीना के बाद भी बेमारी से मुक्त रहले। हालाँकि, एह बीच एह थेरापी के हल्का दुष्प्रभाव मरीजन में देखल गइल बा, बाकी न्यूरोटॉक्सिसिटी मने कि तंत्रिका तंत्र पs परभाव ना पावल गइल बा।
वैश्विक स्तर पs 40 दिन के रिकार्ड
सीएमसी वेल्लोर के डॉक्टर बतवले कि अस्पताल में ही स्वचालित मशीन के इस्तेमाल से इs प्रक्रिया कईल गईल, अवुरी एकरा में करीब नौ दिन लागल। जबकि वैश्विक स्तर पs सीएआर-टी थेरापी में कम से कम पांच हफ्ता यानी 40 दिन के समय लागेला। भारतीय परीक्षण में मरीजन के ताजा कोशिका के इस्तेमाल कइल गइल जवना से तेजी से ठीक हो गइल. उs कहले कि भारत 90 प्रतिशत से जादे सस्ता प्रक्रिया के जन्म देले बा।
इलाज के लागत के 90% बचत होई
भारत में जहाँ कैंसर के इलाज महंगा होला आ अधिकतर लोग के बीमा नइखे. एह थेरेपी से लागत में 90% तक के कमी आवेला। वैश्विक स्तर पs सीएआर-टी थेरेपी के लागत 3,80,000-5,26,000 अमेरिकी डॉलर (लगभग 3-4 करोड़ रुपया) बा, बाकिर वेलकार्ट मॉडल अब एकरा के बहुत कम लागत में उपलब्ध करावे के रास्ता खोल देले बा। ईसीएमआर के कहनाम बा कि भारत में हर साल 50 हजार नया ल्यूकेमिया के मरीज के पता चल रहल बा।
इहो पढ़ीं: अतवारी छौंक: ‘बात कुछ पुरनका दौर के ‘ अपने दौर के underrated एक्ट्रेस रहली ‘राखी गुलजार’
